Ngi kyrshan ia ki ishu, ka shong ha u Bah Pynshngain

Shillong, 23 Risaw:
Ka KHNAM ka la ong ba ka jingkyrshan jongka ia ka PDF kam dei na kano ka daw hynrei na ka bynta ki ishu (mat) kiba u Bah Pynshngain N Syiem kum u CEM u la iakhun na ka bynta ka jaitbynriew bad kam don bynta ban dawa shuki.
“Ngi la kyrshan ia u Bah Pynshngain kum u nongialam namar ki ishu (ki mat) ba u la iakhun ban iada ia ka jaitbgynriew. Ngam kyrshan ban ioh shuki hynrei mynta namar ba ka la thylli, ka shong ha u CEM ba un leh”, la ong u MDC ka KHNAM na Jaiaw uba long teng u CEM barim u Bah Adelbert Nongrum haba iakren hynne ka sngi.
U Bah Nongrum u la ong ba mynta ba la lait thylli lai tylli ki shuki, ka shong beit ha u CEM ba un leh ia kaba donkam hynrei na ka liang ka KHNAM kan nym dawa satia.
Katkum ka jingong u Bah Nongrum lada u CEM u bynshet ha ka KHNAM ia ka kam EM ruh ka kloi ban shim na ka bynta ka jaitbynriew hynrei ym na ka bynta ka politik.
“Ngi kyrshan ia ka PDF hapoh ka jingialam u Bah Pynshngain ym na ka bynta ka politik hynrei na ka bynta ka jaitbynriew”, la bynrap u Bah Nongrum.
Lah ban kdew ba ka shuki EM ha ka KHADC ka la lait thylli lai tylli hadien ki MDC ka Congress ki la risain noh hadien ba ka party ka la sospon ia u Bah Pynshngain N Syiem kum u dkhot ka Congress. Kiba risain ki kynhup ia u Bah Lamphrang Blah, Bah Jansing Tynsong bad Bah Proces T Sawkmie.
Ha kawei ka liang, u Bah Pynshngian u la ong ba un sa pynmih ia ka rai jongu ha kane ka sngi Nyngkong iano un bynshet ia ki kam EM lai tylli hadien ba la risain noh jong kine ki EM.
U CEM un hap ban phah ia ki shithi ienoh kam jong kine ki lai ngut sha u Lat jong ka jylla, bad ia kane yn sa leh hi ha ka sngi nyngkong, ynda la dep ban shim ia ka rai.