Sei madan U Mukul, ba don ka jingiapher jingmut ha ka Congress

Shillong, 19 Naitung:
Ha ki khyndiat taiew ba ladep, ka la don bha ka jingher ki hamsaia, ba ka don ka jing ia kynad kaba napoh napoh, ha ka seng Congress ha Meghalaya, hynrei katei ka la thikna bha mynta ka sngi, haba U Mukul Sangma, myntri rangbah ka Jylla, ula phla hi dalade, ha kawei ka kotkhubor phareng, ha kaba ula ong “Baroh ngi ia ioh pang tyngkhat, kham tam haba ka met ka dei kaba trei shitom. Hynrei ban pynmih ia ki khubor ba bun phew jait ia ka jingpang jongnga, ka dei ka buit shim kabu sain pyrthei, ha kaba baroh ngi tip, ka dei kaba wan naei”.
U Mukul, ula ong shuh shuh, ba haba ki lok ki jor kiba ieid ba thoin, ki kwah bad duwai ba un jem noh, hynrei imat, ki don kiba shun, ba ki kwah pynban ia kaba sniew.
U Mukul, ula kynthoh shuh, da kaba ong ba ka dei ha ka jingialam jongu, ba ka Congress, ka la kiew na ka 7 sha ka 13ngut ki MLA, katba ula kynthah, da kaba ong, ba ha Khasi Hills, ka la hiar na ka 21 sha ka 16, tang namar ka jingiapher jingmut jong ki nongialam bad u ong ruh ba ki dei hi kitei ki juh ki briew, kiba pynphriang ia ki khubor ba har rukom, halor ka jingkoit jingkhiah jongu mynta ruh.
Kat haduh mynta, ym pat da tip shai, ia ka jingpang, kaba don ha utei u nongialam jong ka sorkar Jylla, wat la ki don kiba shim ba ka dei ka jingpang syngkai bad ka don ruh ka jingiakren, ba u donkam ban leit shah sumar noh shabar, ha ki khyndiat taiew ban sa wan, hynrei, ki don pat ki khubor, kiba iathuh, ba mynta ula kham ioh bor bad un sumar beit ha Shillong bad ha Delhi.