“U Haram u khlemraiñ” ong ka Congress ia u bah Pynshngaiñ

Shillong,23 Risaw:
“U haram u khlem-raiñ” ong ka Pyndensoh-saw Polling Booth Youth Congress ia u bah Pynshngaiñ N Syiem ha ka kyrwoh khubor ba la pyllait paidbah mynta ka sngi. Katei ka seng ka la kam ba dei ka seng Congress kaba la pynlong MLA bad MDC ia u bah Pynshngaiñ haduh ba u la kiew ha ka kyrdan CEM.
Ka kyrwoh khubor na u Babatskhem Wanniang, President bad u samla Ashel Wanniang ka Pyndensohsaw Polling Booth Youth Congress (PPBYC) kaba hap ha Hima Bhowal, ka shim ba ka rai jong ka MPCC ka dei kaba la leh janai bad tohkit bniah ia kaei kaba u MLA/MDC ka thain u la leh pyrshah ia ka seng kaba la pynkiew skong ia u ban long kum u CEM ka KHADC. Katei ka seng ka laong ruh ba lada u bah Pynshngaiñ un ym don hapoh ka seng Congress un ym jop ia ka MLA bad MDC ruh.
Ha ka juh ka por ka kyntu ia ki nongkitkam ki nongkyrshan ba radbah jong ka seng Congress hapoh ka thain bad hapoh ka Mawsynram constituency ba kim dei ban shah ialam bakla ha kum kine ki por hynrei ka PPBYC kan dang iai trei shitom ban pynkhlain ia ka seng Congress.