Ba kurup karkhana dieng tang 6 tylli ka KHADC

Shillong, 23 Risaw:
Ka Joint Action Committee jong ka Hima Jirang ka pynpaw ia ka jinglyngngoh ba ki ophisar ka tnad khlaw jong ka KHADC kiba la leit jurip ia ki sawmill hapoh ka Jirang ki la ioh ban kem bad kurup tang hynriew tylli ki dieng na kitei ki sawmill.
Katkum ka kyrwoh ba la phah da u President ka JAC bah O Thangkhiew bad Secretary bah M Sangkli, ki la ong ha ka 14 tarik mynta u bnai ki ophisar jong ka tnad khlaw ka KHADC ryngkat ki briew u Syiem kynthup ki Myntri ki la leit ban jurip ia ka thain Jirang ban wad ia ki dieng ioh don kiba pom dieng tuh ha kaba ki la ioh ban kem tang hynriew tylli ki dieng ba la pom tuh da ki briew.
Ka JAC ka sngew lyngngoh ba ha katei ka jingleit ki jurip ki ophisar ka KHADC kim shym la kem ne cise ia ki dieng ba la ioh kem da ka hima bad la iohi pyllein da ki paidbah kiba don da ki trok ha phyllaw jong ka ophis ka Hima ha Iew New Jirang bad la kynnoh ba ka lah ban don eiei sha lyndet ba kim shym la kem ia kitei ki dieng.
Ka pynpaw katkum ka riti synshar hima naduh ki syiem barim haba ka hima ka ioh ban kem ia ki dieng tuh ki ju pyntip mar mar sha ki bor ka KHADC, bad ka District Council kan wan ban cise ban pyndep ia kaba donkam, hynrei kaba sngewsih ba ki bor ka KHADC kim shym la leh eiei ia kitei ki dieng tuh ba la ioh kem da ka hima bad shu ieh kumto.
Na ka liang ha JAC ka pynpaw ba kane ka jingleh ki ophisar ka KHADC ka lah ban don eiei sha lyndet hapdeng ki briew u Syiem bad ka District Council bad lada jia eiei hadien habud ka KHADC kan hab ban kit khlieh.