U MP um dei ban bunkam iasaid uranium, ong u Bah Adelbert

Shillong, 23 Risaw:
U MDC ka KHNAM na Jaiaw u Bah Adelbert Nongrum u la ong ba u MP ka jylla u Bah Vincent H Pala um dei ban bunkam ban leit iasaid bad ka sorkar pdeng ban tih uranium, ban wanrah lynti rel ha kane ka jylla hynrei u dei ban iasaid ban pynkhlain ia ka jaibynriew.
“Haba nga ong kumne, kam mut ba ngi pyrshah ia ka roi ka par hynrei ngi sngew khia ia ka jaitbynriew”, la ong u Bah Adelbert haba iakren hynne ka sngi.
U la takrain ia u MP namar ba u bunkam ban iakren ia u uranium, ia ka lynti rel katba ka jaitbynriew ka la don ha ka jingma. “U MP um dei ban bunkam ban iasaid ban tih uranium, ban wanrah lynti rel hynrei u dei ban iasaid ha parliament ban pynkylla ia ka riti synshar ka ri ban pynkhlain bor ia ki district council, ki Scheduled Tribe jong ngi ha kane ka jylla”, la ong u Bah Adelbert.
U la ong ba ka la dei ka por ba ki district council kin iasaid ban shimti biang ban ai Scheduled Tribe sertiphiket namar ba kane ka dei ka kamram jong ka district council. “Nga la ong ia u CEM ba ka district council ka dei ban thoh sha ka sorkar jylla bad wat sha ka sorkar pdeng bad sha u MP ba ia ka Scheduled Tribes sertiphiket dei ban ai ban leh da ka district council”, la ong u Bah Adelbert.
U la ong ba kaba ka long mynta ba dang don kiba heh ba trei ha tnad sorkar kum ha DC ophis ki tip ia ka jingai sertiphiket ia ki scheduled tribe hynrei lashai lashi, kaei kaban jia kim don ki para Khasi.
U la ong ba u MP ruh u dei ban rah ha parliament ban iasaid ban pynkylla ia ki jingdkoh jong ka Constitional for Schedule Tribe, Schedule Caste 1950 ban pynkup shuh ia ka jaitbynriew.