Ba duna slap, nang hiar ka jingpynmih ding, ong u Dr Mukul

Shillong, 21 Risaw:
U Myntri Rangbah ka jylla u Dr Mukul Sangma u la ong ba ka jingduna slap mynta u snem ka la pynlong ia ka tnad sam ding ka jylla ka MeECL ba kan iakynduh jingeh shuh ha ka jingsam ding ha ka jylla.
Haba kren mynta ka sngi sha ki lad pathai khubor, u Dr Mukul u la ong ba ka jylla Meghalaya ka dei kaba shaniah haka jingioh slap ban pynmih ding hynrei ka jingduna slap ka la ktah shuh ia kane ka tnad sam ding kaba la don lypa ha ka jingeh ban pynbiang ding ia ki paidbah ka jylla.
“Ngi shaniah ha ka mariang ban ioh slap hynrei mynta u slap u duna bha bad kane ka la ktah ia ka tnad sam ding ka jylla”, la ong u Dr Mukul haba kylli shaphang ka jingpynlip ding ha ka jylla.
U la ong ba ka sorkar kam banse ha ka jingkutlad ban pynlip ding katto katne kynta ban tem ia kane ka jingkyrduh ding ha ka jylla baroh kawei.
U la ong shuh ba ka sorkar jylla kan shim kabu ruh na ka bhah ba ka sorkar pdeng ka la ai ia ki jylla ban shim bording na ki kompeni ban pynioh ding ia ka jylla kum na ka NEEPCO bad na kiwei ki kompeni pynmih ding.
U la ong ba ka sorkar ka la shim ruh ia ka lynti ban pynshlur ia ki paidbah ban pyndonkam noh da ki ding ba ioh na ka sngi ka lyer, na ki sboh mariang khnang ban iarap ia ka MeECL ban pynlait na ka jingban khia kane ka jingsam ding sha ki paidbah.
“Ngi la sam lentern kumba 20 hajar tylli sha ki samla pule ha ki jaka nongkyndong bad kane kan long ka jingpynshlur ba ki paidbah kin pyndonkam ia kane ka jait ding”, la ong u Myntri Rangbah.
U la ong ba ka sorkar kan pynshlur ruh ia ki paidbah ban pyndonkam da ki biomass ban pynmih ding ha ki shnong nongkyndong bad ha kito ki shnong ba la lah ban pynmih ding na kum kine, ka sorkar ka lah ban pynduna ban sam ding MeCEL.
Ha kawei ka por, u la iathuh ba ka sorkar ka la pynkylla kyrteng noh ia ka Meghalaya Non-Conventional Renewable Engery sha ka Meghalaya Renewable Energy Development Agency ka ban pynsaphriang ia kane ka kam.