Weng noh ia U bah Pro, ong U Antonio na U CEM

Shillong, 20 Risaw:
U Executive Member ba peit ia ka pla tyngka ka KHADC, u bah Neil Antonio War u la dawa na u Chief Executive Member ka KHADC ba dei ban weng noh ia u MDC ka Mawlai uba dei ruh u Dy.CEM u bah Process T Sawkmie na ka Executive Committee namar ki jingkren jong u pyrshah ia ka Executive Committee ha Ing dorbar. “Nga dawa na u CEM ba u dei ban weng noh ia u, ka bha ba un don shabar, ban kynthoh pyrshah ia ka EC kum u Dy.CEM ka dei ba u don da ki jingmut kiba sniew ban pynjot pynpra ia ka EC” ong u bah Antonio War haba kren sha ki nongthohkhubor. Shuh shuh u la ong “U ban Process u dei ruh uba la pynkhih bha ban pynhap shuki ia u bah Pynshngaiñ ha ka por ba ngi ia donlang hapoh ka seng Congress, u la dei ban shim noh da ka rai ban shu risaiñ hi”.
U bah Antonio u la ong ba ka jingdawa u bah Process ha ing dorbar ba u EM ba bat ia ka pla tyngka u dei ban hiar shuki khnang ba ka jingtohkit kan long kaba khuid , u bah Antonio War u la ong ba ka dei ka bym don jingmut eiei katei ka jingdawa namarba um don jingtip eiei shaphang katei ka jingrung ka pisa Professional Tax na Nongpoh bad Nongstoiñ sha ka Account ki riew shimet naba ka bui kam shym la iaid lyngba ka tnad pla tyngka. “Baroh ki dkhot ka EC ki sah ha ka umdum ia katei ka pisa, kaba dei naduh u snem 2013, 2014, 2015 bad 2016, ngim don jingtip eiei-ieh kan lap hi ka kynhun tohkit” u la ong.
Halor ki jingkren u bah Process T Sawkmie sha ki nongthohkhubor ba ka jingkyrshan ka seng Congress ia ka EC ba ialam u bah Pynshngaiñ ka dei kaba tang shipor, u bah Pynshngaiñ N Syiem (CEM) u la ong ba ka dei ka jingkren jong u hi shimet bad kam dei kaba mih na u nongialam ( PP Leader) ka seng Congress, “Nga shim ba ka dei ka jingkren shimet” u la ong. Halor ka jingdawa u bah Process ia u EM ba peit ia ka pla tyngka ba un hiar shuki noh u bah Pynshngaiñ u la ong ba katei ka shong ha ka jingpyniaid jong u kum u CEM. Lah ban kdew ba u bah Process u la pynsngew ruh hapoh ing dorbar ba u bat ia ka kam Dy.CEM tang ha ka kyrteng hynrei u khlem ioh ban trei ia ka kam, u ba Pynshngaiñ u la ong ba ka dei ka kamram jong u ban kren ha u CEM lada ka long kumta ym ban kren hapoh ing dorbar.