“Ngan sah shwa kum U MDC shimet; ngan sngap ia ki nongkyrshan”

Shillong, 20 Risaw:
Ki MDC ka Congress ba la phet seng ne risain dang shen, kim pat rai shano kano ka seng ba kin leit iasoh hynrei ki dang don mynta hapdeng ka jingkhan jingpyrkhat shwa.
Haba twad jingmut hadien ba ki la dep risain na ka Congress, u MDC ka Mawkynrew u Bah Banteidor Lyngdoh bad u Bah Hadrian Lyngdoh na Mawkyrwat ki la ong ba kim pat shim ia kano kano ka rai ban leit iasoh bad kano kano ka party hynrei kin sah shwa kumba long mynta kum ki MDC shimet.
“Ngam pat rai ban iasoh bad kano kano ka party ne ka kynhun”, la ong u Bah Banteidor haba iakren mynta ka sngi. Katba u Bah Hadrian Lyngdoh u la ong, “Ngan sngap ia ka sur jong ki nongkyrshan jong nga shwa ba ngan leit sha kano kano ka kynhun”.
U Bah Hadrian u la ong ba haduh mynta, um pat don ki party ne ki kynhun ba wan ban khroh ia u ban rung namar ba na ka liang jongu ruh, um pat don jingthmu namar ba ka dang kloi than ban shu shim rai kyrkieh.
San ngut ki MDC ka Congress ki la risain noh na ka jinglong dkhot na ka party ha kane ka taiew ban pyrshah ia ka rai ka MPCC ban sospen haduh lai snem ia u Bah Pynshngain N Syiem uba long u CEM ka KHADC mynta.
La ong ba kine ki san ngut ki dei ki synran ba satar jong u Bah Pynshngain kiba la rai kut ban don ha syndah jongu bad ban ieh noh ia ka party Congress.
U Bah Banteidor u la ong ba ha ka konstitwensi jongu ha Mawkynrew, ki paidbah nongkyrshan ka Congress ki bud bad don beit bad u haduh kine ki sngi lait noh tang katto katne ngut kiba don ha ka party.
“Ka party Congress ka dei kaba niew bein ia ki rit ki ria. Ha ka por ba ka donkam ka wad ia ki hynrei ynda ka la ioh lad, ka noin bein ia ki”, la ong u Bah Banteidor bad bynrap, ba ki paidbah ki dei ban sngewthuh shai halor kane.