Mynta yn weng noh ka Congress ialade na ka PDF

Shillong,20 Risaw:
Ki tyllong khubor kiba jan bha bad ka seng Congress, ki la iathuh ba mynta ka miet ka la don ka jingialang jong ka seng ban pyrkhat na bynta ka saiñpyrthei ha KHADC. Katkum ki khubor ba la ioh lum la iathuh ba lashai ka sngi ka 21 tarik u risaw, ka seng Congress kan weng noh ialade napoh ka kynhun PDF kaba ialam da u bah Pynshngaiñ N Syiem (CEM) bad kan shong noh ha ka Liang Pyrshah. Kumba long mynta ki don 5 ngut ki MDC Congress ha KHADC bad kitei ki long u bah Process T Sawkmie Dy.CEM, bah Manstudy Nongrem –Chairman,bah Donevan Kharwanlang Deputy Chairman, bah Lamphrang Blah EM Elaka bad u bah Jansing Tynsong EM ka Labour.
Haduh mynta ka PDF ka don 21 ngut ki MDC na ka 23 ngut bad lada kan duh noh ia ki 5 ngut ki MDC Congress kan sah sa tang 16 ngut, hynrei la ioh jingtip pat ba ka seng Congress ka don sa 5 ngut kiwei pat ki MDC kiba kyrshan ia ki bad lada jia ba kitei ki 5 ngut ruh kin phet noh na ka PDF , ka jingbun paid ka PDF kan sah sa tang 11 ngut. Lada jia ba 10 ngut kin mih,kheinlang bad 2 ngut ki MDC ka HSPDP ka liang pyrshah kan poi sha ka 13 ngut. Ki lad khubor ki la iathuh ba lada ka long kumtei khlem pep kan wan ka synshar Administrator (Administrative Rules) ha KHADC.