Ka sorkar jylla ka la pynbna iar ba kito kiba kwah ban dih kyiad ki dei ban ym duna ia ka 21 snem ka rta bad kiba hapoh kane, kim lah ban dih bad lada lap yn pynshitom. Wat kiba thied kyiad ruh na Winestore kim dei ban duna ia ka 21 snem bad ki dei ban wanrah da ki ID ban pynshisha ia ka rta jongki.
Katkum ka jingtip ba la ioh na ka tnad Excise, la iathuh ba kham mynshwa, kito kiba la dap 18 snem shaneng, ki lah ban dih khor (kyiad) hynrei dang shen, ka sorkar ka la pynkiew ia ka rta jong ki mendih ba kim bit ban duna ia ka 21 snem.
Hynrei ha kawei ka liang, la iathuh ba ka long kaba eh ban pyrkhing ia kito kiba dih tuh ne leh tuh watla kim pat biang ka rta ban bat klas rangbah (dih kyaid). Kane ka kyndon ka treikam pyrkhing ia ki winestore, ki bar, ki discotheque.
Katkum ka jinglum jingtip ne ka tnad Excise, tang ha East Khasi Hills, la don kumba 93 ki winestore, 25 tylli ki bar (jaka dih)kynthup ki discotheque (jingiadih bad iashad miet) kiba don ha ka nongbah Shillong. Kine ki dei kiba la ioh license na ka sorkar hynrei kim lah ban iaid ia ki kyndon bad ka por plie ia ki winestor ka long naduh ka por 10 baje mynstep haduh 9 baje mynmiet, katba ia ki bar ka long haduh ka por 8 baje mynmiet.
Kumjuh ki nightclub ne discotheque ka long kumjuh tangba kito kiba kwah ban pynjlan ia ka por kin hap siew ka dor kyrpang. Kiba khang haduh 10 baje mynmiet kan long T.1500 shi miet bad 10 baje mynmiet shaneng kin hap siew T. 2500 shi miet.
Kiba bun ki nighclub kiba don ha Shillong ki dang dei tang ki 3 star hotel kum ka Pine Wood Hotel, Central Point, PoloTower, Alpine Continental.
Ka license ia ki winestore ka long T. 60 hajar shi snem katba ia kito ki bar bad ki discotheque ka long T. 45 hajar shi snem.
Ha kawei la iathuh ba na ka bynta kito kiba kwah ban pynlong kum ka wine festival lah ban ioh license ban pynlong tangba ka dor kan long T. 2500 shi sngi.
Phi don ban ong eiei?