Ther maw bad kawang Petrol Bomb ha Tura

Shillong, 17 Risaw:
Hadien ka jingiap uwei u samla uba la tip kyrteng kum u Sengat Sangma, ka la mih ka huri hura ha Rishipara, ka jaka ba utei u samla u la iap hadien ka jingshah shoh ha ka kynhun ki runar ha katei ka shnong. Mynta ka janmiet ka la mih ka jingther maw bad ka jingkwang petrol bomb sha ingsah briew. Tang mar ia ioh jingtip ia katei ka jingjia ki pulit ka Quick Response Team ki la tur wut wut sha katei ka jaka ban tem ia ka jingjia. La iathuh ba ha katei ka jingjia kawei ka ingsah briew ka la kem ding hynrei la lah ban tem ia ka ding da ki nongshong shnong bad ki bor pulit.
U Deputy Commissioner ka West Garo Hills u Pravin Bakshi u la ong ba mynta la lah ban tem ia katei ka jingjia. Ki sengbhalang bapher bapher ha katei ka District ki la dawa na u DC ba dei ban kem mardor ia ki runar kiba donkti ban shoh ia u Sangma haduh ba un da iap. Lah ban pynkynmaw ba ha ka 13 tarik mynta u bnai utei u samla u la shah shoh ha katei ka shnong bad ha katei ka jingjia ki pulit ki la ioh ban pyllait ia u hynrei namar ka jingjur palat ka jingmynsaw utei u samla u la khlad noh. 8 ngut ki la shah kem ha katei ka jingjia.