Ym pat rai ka UDP ban kyrshan ne em ia U Bah Pynshngain

Shillong, 16 Risaw:
Ka UDP kam pat shim ia kano kano ka rai la kan kyrshan ne em ia u Bah Pynshngain N Syiem uba long u nongialam ka PDF bad u CEM ka KHADC hadien ba u la shah tait iing noh haduh lai snem ha ka party Congress.
Ha ka jingiakren bad u nongialam ka UDP ba dei ruh u MDC u Bah Teinwel Dkhar u la ong ba haduh mynta ka party kam pat shong jingialang namar ba ka jingjia kynsan ia u Bah Pynshngain uba shah sospon haduh lai snem ha ka party halor ki kam pyrshah seng.
“Ka dang shu jia ha kane ka sngi Thohdieng bad hynnin ka sngi shuti, ngim pat ioh iakren ha ka party”, la ong u Bah Dkhar.
U la ong ba ha ka jingshisha, ka UDP kam don bynta eiei halor ki kam ba iadei bad u Bah Pynshngain bad ka Congress, namar ba ka dei ka kam iing kam sem jong ka Congress. “Ngim don bynta eiei ia ka jingiadei u bah Pynshngain bad ka party, ka dei kam iing jongki”, la ong u Bah Dkhar.
U la ong ba ka party kan shong jingialang ban iapyrkhat halor kane namar ba ka Congress ka la dep pynkylla ia u nongialam jongka CPP u Bah Mansturdy Nongrem.
“Ngi ha ka UDP, ngi kyrshan ia ki mat ba u Bah Pynshngain u la iakhun, hynrei mynta hadien ba la mih kynrum kynram, ngin sa iashong ngin kyrshan ne em”, u la ong.
U Bah Dkhar u la ong ba na ka liang ki MDC ka UDP, kin ap ia ka rai ka seng kmie bad kano kano kaba bthah, kin leh beit ia kata. Ngin shaniah ha ka seng kmie ka UDP, lada ka ong kyrshan ngin kyrshan bad lada ka ong weng,ngin wen”, la ong u Bah DKhar.
Ha kawei ka liang, ka HSPDP ka la ong ba kan don beit ha ka liangpyrshah bad kam pat shong jingialang eiei halor kane ka kam. “Kumba long ngi long beit kumjuh kata ngi don ha ka liangpyrshah”, la ong ka MDC ka HSPDP ka Kong Teinlinia Thangkhiew.
Ka la ong ba ka jingjia ia u Bah Pynshngain ka dei ka kam iing jongki hapoh ka party Congress bad kim kwah ban ong eiei halor kane ka bynta.
Ha kawei ka liang, la ioh jingtip ba ki dkhot jong ka PDF kiba don mynta 16 ngut kynthup ia u CEM, ka ai ia ka jingshaniah ha u bah PN Syiem ban bteng ia ka kam nongialam watla u la shah tait seng ha ka party haduh lai snem.
Ka jingialang jong ka PDF , kiba la ai poi sha ka jingialang ki long 14 ngut, lait noh u Bah LG Nongsiej bad u Bah Victor Rani namar ba kim don ha Shillong hynrei kila pyntip ba ki don ryngkat bad ka PDF.