Nga la duwai Blei shuwa ban risaiñ: Banteidor

Shillong, 14 Risaw:
U MDC ka seng Congress na Mawkynrew u bah Banteidor Lyngdoh (Paidang) mynta ka sngi u la risaiñ noh na ka seng Congress bad haba shim ia katei ka rai u bah Banteidor u la ong “Nga la duwai ha U Blei shuwa ban shim ia kane ka rai”. Shuh shuh u la ong “Ha nga ki paidbah bad ka jaitbynriew ka kham kordor ban ia ka party bad na kata ka daw, nga la shim ia kane ka rai ban risain noh na ka jinglong dkhot na ka party Congress”.
Tang mar ia sospon ia u bah Pynshngaiñ ka seng Congress ka la lum ia ka Congress Parliamentary Party (CPP) ban jied ia u nongialam ba thymmai jong ka bad ka la jied ia u bah Mansturdy Nongrem kum u nong ialam ba thymmai ha ka jaka u bah Pynshngaiñ, kiwei pat ki MDC Congress kiba donlang ha katei ka jingialang ki long u Bah Process T Sawkmie, Bah Donevan Kharwanlang, Bah Lamphrang Blah, bad Bah Jansing Tynsong nalor u Bah Manstudy Nongrem.