Mynta yn sdang pyni bor ki nongshongiew ia ka Hima Mylliem

Shillong,14 Risaw:
Man la ka sngi saitjaiñ jong ka taiew ka dei ka sngi ba ki nong shong iew ki ju siew bai khajna sar iew shisien shi taiew, bad la iathuh da ki nongiew ba lada ki nong khrong pisa kim lah ban lum lut ha ka sngi saitjaiñ ki ju lum pyndep ha ka lah sngi u blei na bynta ka shi taiew. Lah ban pynkyn maw ba ka seng ki nongshong iew ka Nong Iew Association ha kine ki khyndiat sngi ka la rai ban ym siew bai khajna sar iew shuh naduh mynta ka taiew naba ka hima Mylliem ka la kren shai ba katei kam don jingtip eiei ia katei ka khajna bad ka la ong ba ka dei ka jing lum be-aiñ kaba dei ban bat bad kem ia ki nongwan lum.
Hadien katei ka rai ba ki nongshongiew ki la shim, lashai ka sngi saitjaiñ kan dei ka sngi ba kin sdang ban pyni bor ha kaba kin ym siew shuh ia ka bai khajna sar iew bad ki la byrngem ruh ban bat beit ia kiba wan khrong naba ki la ioh jingshai na u myntri iew ka Hima Mylliem ba ka dei kaba shu leh khlem ka jingtip ka hima bad ka dei ruh ka jingkhrong be-aiñ. U Rupang mynta ka sngi u la ia kren bad u President ki nongshong iew u bah Korbar Lyngdoh Nonglait bad ha ka jingiakren u la ong ba baroh ki nongshong iew kiba la tip lut ia katei ka rai ki la rai ban ym siew shuh bad ban bat beit ia ki nongwan khrong pisa.
Lah ban pynkynmaw ba ha kine ki khyndiat sngi, u CEM ka KHADC u bah Pynshngaiñ N Syiem u la pynpaw ka jinglyngngoh balei ba ka hima Mylliem kam lah ban lehkhuid ia ka iew watla ka ju lum pisa palat ia ka T.5 lak tyngka shibnai na iewduh. Hynrei ha ka 11 tarik mynta u bnai u myntri ka Hima Mylliem uba peit ia ka iew u myntri C.Kharkongor u la kyntait ba ka Hima Mylliem ka lum pisa na ki nongiew bad u la ong ba ka hima kam ju lum pisa bai pynkhuid iew na ki nongiew.