Dohiap dohim, ngi dei ban jop: Lapang

Shillong,14 Risaw:
U President ka MPCC u bah D.D Lapang u la bthah ia baroh ki dkhot ka seng Congress ba kin iaid da kawei ka sur ha kane ka elekshon MDC shiteng samoi bad kata ka sur ka dei ban long “Dohiap-dohiap, ngi dei ban jop” ne kaba ki ong ha ka ktien nongwei
“Do or die” U bah Lapang u la ong ba don kiba ong ba ka seng Congress kan jah kyrteng ha u 2018 hynrei u la bthah ia ki nongtrei shitrhem katei ka seng ba kin trei shitom ba kan wan biang ha ka bor synshar ha u 2018.
U myntri rangbah ka jylla u Dr.Mukul Sangma pat u la ong ba ka elekshon ka dei ka kabu ksiar ia ki briew jong katei ka Party ban ia kynduh ia ki paidbah bad baroh ki dei ban shim ia ka kabu ban kren ia ki mat kum ka jingioh jylla, ka bor ba kyrpang jong ka 6th Schedule, ka hok ki riewlum bad kiwei pat kiba la pynkupbor da ka riti synshar ka ri da ka seng Congress. U Dr.Mukul u la ogn ruh ba uwei u briew u donkam ban bat tang kawei ka kam khnang ban ailad lem ia kiwei pat, u la kren ruh ia kiwei ki bynta kiba ka seng Congress ka la trei kum ka jingshah khang tih dewiong ha ka NGT.
Kitei ki nongialam Congress ki la kren ha ka jingialang ka MPCC kaba la long mynta ka sngi ha Congress Bhawan ha kaba la donlang ruh ki 7 ngut ki kyrtong katei ka seng ki ban ia khun ha ka elekshon MDC shiteng samoi 6 ha KHADC bad wei ha JHADC. Ha katei ka jingialang la don ki myntri sorkar, ki MLA congress, u MP Congress na Shillong, CEM na JHADC, ki MDC, bad kiwei pat ki nongkitkam ka seng Congress ha District, Block bad kiwei.