Kmen u Bah Jrop ba wan phai iing biang u bah Leston

Shillong, 18 Naitung:
Ka jingwanphai biang u Bah Leston Wanswett sha ka sem Congress ka la long ka jingkmen ia ki nongialam ka party Congress na Shella kynthup ia u kandidet jong ka party ha kane ka elekshon kaba dang shu dep, u Bah Jrop Sing Nongkhlaw.
U Bah Leston uba la mih na ka Party ha kane ka elekshon MLA ba dang shu dep, u la iakhun kum u kyrtong shimet na Shella constituency hadien ba u la duh tiket na ka Congress ba iaknieh bad u Bah Jrop.
Hynrei dang shen, u Bah Leston u la rai ban wanphai biang sha ka sem Congress hadien ba la iakren ki heh ka Congress.
Haba iakren hynne bad u Bah Jrop uba long u working president ka Congress na Shella Block u la ong ba ka jingwan phai u Bah Lest ka long ka jingkmen ia u bad ia ka party.
“Nga sngew kmen ia ka jingwan phai biang u bah Leston bad kum u briew jong ka party nga kohnguh beit ia ka hokum ka party”, la ong u bah Jrop bad bynrap ba ka jingrem ka Congress ha kane ka elekshon MLA kaba dang shu dep ka dei namar ka jingiapait iapra ha ka sem.
U la ong ruh ba na ka bynta ka elekshon MDC, u Bah Jrop u la ong ba ka shong ha ka jingibit ka party iano ka donkam bad ka idei ban ai tiket namar ba kum u shipai ba kohnguh sneng jong ka party, u shaniah ha ki nongialam ban leh ia kaba bha tam.
Lah ban kdew ba u Bah Jrop uba iakhun na ka party Congress u la kamai vote kumba 2 hajar tam ha kane ka elekshon ba la dep katba u Bah Leston u la kamai kumba 5 hajar vote.
Lada khein lang ia ka vote jong u Bah Jrop bad u Bah Leston, ka Congress kan poi sha ka jingjop namar ba u Dr Donkupar Roy u la tam ia u bah Leston tang da ki spah vote.