Mih ka song ksiar bad ka tyngka pliah na phyllaw iing

Shillong, 13 Risaw:
Ha ka jingjia kaba ym kham ju iohsngew koit uwei u rangbah uba la tip kyrteng kum u Swapan Paul u la pynphai noh ia ki tyngka pliah ba u ioh tam na phyllaw ing jong u mynhynin ka miet. Utei u rangbah u dei uba shong ba sah ha Upper Jail Road , Shillong, u la ioh tam na phyllaw ing jong u ia ki jingdeng ksiar bad ka pisa kaba shongdor haduh T.1.50 lak tyngka. Utei u rangbah u la pynphai noh sha ki pulit ka Sadar PS bad u la iathuh ha ki pulit ba u ioh tam na phyllaw iing jong u mynhynnin ka miet.
Hadien ki pulit ki la lap ba kitei ki tyngka pliah dei kiba u nongtuh u la leit bret ha phyllaw ing jong utei u briew namar ba ki la ioh jingujor na u Manik Paul uba sah ha Jail Road ba ki nongtuh ki rong tuh ia ki jingdeng ksiar bad ka pisa na ing jong u, hadien ki pulit ki la ioh kem ruh ia u Dilip Nath bad la kynnoh ba dei utei uba tuh ia katei ka pisa.