Lada brut ka Congress ha ka elekshon MDC shiteng samoi yn kylla sorkar ha KHADC

Shillong,12risaw:
Ki don 6 tylli ki konstitwensi ha Khasi Hills Autonomous District Council ( KHADC) kiba hap ban ia khun ia ka elekshon MDC shiteng samoi namar ka jingrisaiñ noh ki MDC jong ki. Kumba ka long mynta ha KHADC ki don 6 tylli ki jaka ki MDC ba thylli bad kawei ka jaka ia u MDC shu sieh.
Ka PDF ka dei ka kynhun kaba bat ia ka bor synshar ha KHADC bad ia katei ka kynhun la ialam da ka seng Congress, kumba ka long mynta hapoh katei ka kynhun la khleh lang ruh bad ki seng riewlum kumjuh ki MDC Independent. Ha katei ka kynhun ki don 3 ngut ki MDC ka UDP kata u bah Teinwell Dkhar, bah Donkupar Sumer bad ka kong Rona Khymdeit, ki don ar ngut ki MDC ka KHNAM u bah Adelbert Nongrum bad u bah James Ban Basaiawmoit, nangta ki don 2 ngut HSPDP u bah Pyniaid sing Syiem bad ka kong Teilinia Thangkhiew, 4 ngut ki Independent u bah Morningstar Mawsor , bah L.G Nongsiej, bah James Sylliang bad ka kong Gracemary Kharpuri.
Haba kheinlang ia kitei baroh ki don 11 ngut bad lada jia ba ka seng Congress kan brut ha ki 6 tylli ki konstitwensi ha kane ka elekshon shiteng samoi , ka jingdon ki MDC bym dei Congress kan poi sha ka 17 ngut bad katei ka nombar ka la biang pura ia ki seng bym dei Congress ban bat hi noh ia ka bor synshar ha KHADC. Katkum ka jingiohlum khubor la sngewthuh ba lada jia ba ka seng Congress kan brut ha katei ka elekshon MDC shiteng samoi ka liang synshar ha KHADC ruh kan khyllem noh ha kaba kin don ki MDC thymmai ki ban wan pynkhih ia ka sainpyrthei ha District Council.
Kumba ka long mynta la ioh jingtip ba ki la don lypa ki MDC napoh ing jong ka PDF ruh ki bym sngewtynnad shuh ia u CEM, hynrei ka jingbym donlad ban thaw pyrthei da kumwei pat namar bym don ka jingbun paid ka la pynlong ia ki ban shong dohiap hapoh ka PDF la ka long kumno kumno ruh, bad lasngewthuh ruh ba lada jia ba wan ki MDC thymmai ki bym dei Congress kin don ki MDC kiba don hapoh ka PDF mynta ki ban ia syllok bad ki ban thaw sorkar da kaba thymmai ha KHADC.
Une u nongthohkhubor u la twad jingmut na ki pyrman jong ka sain pyrthei shaphang ka elekshon MDc shiteng samoi , bad kitei ki la iathuh ba ha manla ki jaka ka seng Congress kan liem hynrei kaba artatien ka dei sa tang ha konstitwensi u myntri ka tnad kam pohing u bah HDR Lyngdoh kata ha Sohiong konstitwensi naba hangtei u la pyniakhun da u khun la jong.