Ka prokram kolshor tynrai ha NEHU

Shillong, 12 Risaw:
Ka North-Eastern Hill University ryngkat bad ka Tata Steel kan pynlong ia ka Regional Samvaad (North-East India), ha ka 14 bad 15 tarik mynta u bnai ha NEHU, Shillong. Katba ia ka jingialang kaba heh pat yn pynlong naduh ka 15 haduh 19 u naiwieng ha Jamshedpur, Jharkhand ban kynmaw burom ia ka lyngkhuh sngi kha jong u Birsa Munda, u nongiakhun laitluid ki riewlum kaba dei ruh ka lyngkhuh sngi ioh jylla ka Jharkhand.
Katei ka dei ka jingialang ban pynneh pynsah ia ka riti ka dustur bad kyntiew ia ka kolshor tynrai,yn plie ia katei ka Samvaad ha ka 14 tarik u Risaw ha Multi-Use Convention Hall ha ka por 11:30 baje mynstep, u Prof. S.K. Srivastava, Vice-Chancellor, NEHU un long u kongsan katba u Prof. Henry Lamin, Pro-Vice-Chancellor un long u symbud kongsan. Ia ki prokram ki ban pynlong ha Shillong la phiah ha ki lai bynta –ar tylli ha ka 14 tarik bad kawei ha ka 15 tarik, kan don ka prokram pyni jingput jingshad tynrai ha ka janmiet 14 tarik naduh ka 5:30 baje janmiet.