Rakhe 175snem ka JSD Ummulong

Jowai, 10 Risaw:
Ka Jingiaseng Samla District, (JSD) Ummulong, West Jaintia Hills District, ka la pynlong ia ka jingleh-kmen halor ka jingdap 175 snem (Dosqui Centennial Celebration 1841-2016) Khasi Jaintia Presbyterian Assembly. Ia kane ka jinglehkmen la pynlong da ka ialehkai phutbol ha Madan Mookyndur bad ka jing ia rwai Ummulong Presbyterian Higher Secondary School, Ummu-long, ha ka 08tarik mynta u bnai.
Ha shwa ban sdang ka jinglehkmen ha katei ka sngi la don ka jingiaseng bad ka jingialang kaba la pyniaid da u Pastor Incharge Rev. N.S. Phawa, ha ka jingiadonlang u Rev. A.L. Laskor uba long u kongsan, Rev. Rihok-I-Oo Laloo, u Donbok Passah Chairman, u Ribok Laloo Secretary ki dkhot ka Jingiaseng Samla District, Ummulong, ki Rangbah District, u Acting Dolloi Elaka Maskut ma Phrangki Ryngjah bad kiwei de kiba shah khot sngewbha na Balang bad kiwei de.
Ha ka jingiakop phutbol la wan ban iashim bynta da ka Jingiaseng Samla District Ummulong, ki Dkhot Committee Balang hapoh ka District, Jingiaseng Samla Balang Presbyterian Ummulong, Maskut, Mookyndur bad Madur, kiba la iashim bynta da ki samla shynrang bad khynthei kumjuh ruh ki rangbah.
Ha ka jingiakop phutbol na ka liang ki shynrang, ka Jingiaseng Samla Mookyndur ka la jop ia ka Jingiaseng Samla Maskut bad na ka liang ki khynthei ka Jingiaseng Samla Mookyndur ka la jop ia ka Jingiaseng Samla Madur. Ki Dkhot Committee Balang hapoh ka District Ummulong ki la jop ia ki Dkhot ka Executive Committee kiba don hapoh ka jingiaseng Samla District, Ummulong.
Ha katei ka sngi la pynkut ia ka jingrakhe da ka jingiaseng duwai ha ka por janmiet bad da ka jing ia rwai, ba la ialam da ka Saving Sound Band na Nongkrem. Ia ki khusnam sha ki nongjop ha ka jingiakop phutbol, la sam da u TBn. S.Mukhim, TBn. S. Nongpluh bad TBn. N. Kharlukhi.