Sma iwtung ka surok Mylliem, na ki jaboh ba pynlang harud surok

Shillong, 10 Risaw:
Harud surok bah ban hiar sha Mylliem la i kumba ka dei ka Marten, naba la iohi ba la don lymbung ki jaboh jabaiñ kiba la pynlang hangtei kaba la lah ban ithuh ba ka dei kaba la wan bret khnang ha katei ka jaka. Katei ka jaka mynta ka la sma iwtung bad la iohi ba ki don ki byrni dewbilat,ki byrni phan kiba la thep sbuk da ki phan pyut, ki jhur, ki plastik, nangta la iohi ba ki don sa ki jaboh kiba la wan bret na ki jaka ba dang shu shna ing thymmai namarba la don ba pynlang ia ki Tiles lyngkhot, ki dieng, ki dewbilat bad kiwei pat ki jaboh.
Katei ka jaka kaba la i kumba ka dei ka Marten ka dei kaba don ha ka jaka shuwa ban poi ha Soilyna Hut (haba hiar na Shillong ban leit sha Mylliem) hajan ka lynti ban rung sha pung Marbari.
Ka jingmih jong katei ka jaka bret jaboh harud surok bah ka la ai mynsiem ia ki briew kiba nabar khamtam ki nongwan jngohkai pyrthei ban kawang madei mata ia ka jaboh jabaiñ ha katei ka thup bret jaboh, kaba kim donkam ban hiar na kali ruh ( kaba lah ban shu pynhap tok tang na jingkhang ït kali).
Bun ki kali kiba leit ba wan ha katei ka surok bah ban hiar sha Sohra, sha Mawlynnong bad une u nongthohkhubor u la iohi ba tang mar ia poi ha katei ka jaka bun ki kali ki sangeh ban bret ñiut bad don ruh kiba hiar ban leit pynjhieh naba ki shim ba katei ka dei ka jaka bret jaboh paidbah.
Na ki jaboh kiba la pynlang hangtei la ithuh ba kim dei shuh ki jaboh kiba dang shu bret dang shisngiar-sngi hynrei ki dei kiba sah taiew naba la sdang ban wan ka jingsma iwtung.
Mynta ka sngi ki nongialam ka HYC-Upper Shillong Circle hapoh ka jingialam jong u Danny Rynjah President ki la leit ban jurip ia katei ka jaka bad ki la pynpaw ka jingbitar ia katei ka jingleh khlem akor da mano re kaba la i saitmet bad kaba la pynjahburom ia ka Upper Shillong baroh kawei .
Ki la kyntu ia ki trai jaka kumjuh ia ki bor shnong ba peit ia katei ka jaka ba ki dei ban shim ka jingkitkhlieh ban pynthikna ba katei ka jaka ka dei ban khuid hapoh shi taiew lym kumta kin iaid shakhmat ban leh ia kaba donkam.
Ki la kynthoh ba katei ka jingleh khlem akor ha surok bah ka la pynkhlem raiñ ia ka Upper Shillong baroh kawei khamtam ba ka dei ka kadbah ba ki nongwan jngohkai pyrthei na kylleng ki jaka ki iaid lynti nangtei ban hiar sha Sohra ne sha Mawlynnong bad sha Dawki.