Dih bih u samla ba shah mai ha ing ba ia khlad samla

Jowai, 9 Risaw:
Ar ngut ki briew ki la duh ei ia la ka mynsiem ba kordor hadien ba ki la ngam jyllop ha kawei ka pung kaba don ha ruh shnong ha Jarain, Amla-rem Sub-Division. Kitei ki ar ngut kiba iap ki dei na ka shnong Jarain.
Kitei kiba iap jyllop kidei kiba la tip kyrteng kum u Won Khyriem, 55 snem bad u khynnah 12 snem u ba kyrteng u Rilancy Pamthied uba dei u khun jong u ma Wing Surong.
La iathuh ba ha katei ka pung rit kaba don harud surok ban leit na Jarain sha Amlarem, ki khynnah ki ju myllien bha ban sum bad ban jngi. Utei u khynnah ar snem ruh uba nang bha ban jngi hynrei hynnin ka sngi Saitjain ha ka por kumba 2:30 eiei janmeit kaba ki dang ia jngi u la ngap jyllop noh.
Utei u Rangbah, u ma Won Khyriem uba la wan lang ba utei u khynnah 12 snem u la kynthih ban pyllait im ia u hynrei ma u ruh u la ngap jyllop lang bad iap noh.
Ia ka met jong ki baroh ar ngut la pynkhuid hynne ka sngi U Blei ha shnong Jarain.
Ha kawei pat ka khubor, la iathuh ba uwei u samla u la dih bih tang na ka daw ba u shah mai ha ing ba u ialang samla.Utei u samla u la dih bih ha ka por 12 baje mysngi ha ing lajong ha ka shnong Amtasam, Amlarem Sub-Division bad tang mar kumta hi la pynkit ia u sha Civil Hospital, Ialong hynrei ha ka por 3 baje nohphai sngi u la khlad noh.
Utei u samla u dei uba la tip kyrteng kum u Riskhem Kassar uba dang leit skul ha Ri-war Jaintia Church of God School Ladjaplem, Amlarem bad u dang shong ha ka klas 10, u dei u khun jong ka kong Mebi Kassar bad u bah Sar Rasmut. Utei u samla u la ioh ban dih da ka dawai siat khniang kaba don ha ingsah jong u hi. Ia ka metiap jong u la pynkit noh mynta ka miet na Ialong sha Amtasam.