Pyndeng khlur U Mukul ia ka kynhun nyngkong ki pulit SF-10

Shillong, 05 Risaw:
Ka kynhun ba nyng-kong jong ki samla ba la pyndep ia ka kam pulit SF-10, ba kynthup 223 ngut ki pulit Commando bad 115 ngut ki Ranger ki la shah pyndeng khlur ha u Myntri Rangbah ka jylla u Dr Mukul Sangma mynta ka sngi ha MLP Mawiong, hadien ba ki la pyndep ia ka jingshah hikai kaba 6 bnai halor ka Special Commando Counter Insurgency Course.
Kine ki pulit thymmai ka jylla ki la shah pynbam smai ha u Commandant ka 1st MLP Battalion shwa ba kin leit sha ka lyngkha ban leh ia la kamram jongki.
Ha ka ryngkat ka jingdonlang kiba haiing hasem, ka kynhun ki myntri sorkar, u Myntri Rangbah u la pympaw ia ka jingsngew skhem ba kine ki pulit SF-10 ki la long ba la khreh ban aiti ialade ban shakri ia ka ri. “Kane ka pynkynmaw ia ka jingkut jingmut ka sorkar ban wanrah ia ka mynsiem shngain ia ki paidbah bad ban pynher krad ia ki kam sniew”, la ong u Myntri Rangbah.
U la ong ba lyngba ka jingdon ki pulit SF-10, kan pynkhlain shuh shuh ia ka tnad pulit ka jylla ban iakhun pyrshah ia ki kam sniew ha ka jylla bad ban pynneh ia ka suk ka sain, kumba la khmih lynti ki paidbah.
“Kan don shuh ka jingpynrung kam ia ki kynthei bad shynrang kaba kum kane ban pynthikna ba ka jingshngain jong ngi kan long kaba bha tam”, la ong u Dr Mukul.
U la pynpaw ruh ia ka jingsngewnguh ia kiba haiing hasem ki kmie ki kpa jong ki samla ba la pyndep ia kane ka jingshah hikai ha kaba ki kam ba khraw ki dang don shakhmat ba kin leh na ka bynta ka ri.
“U Blei un kyrkhu iaphi baroh”, la kitbok u Dr Mukul ia ki pulit SF-10.
U Myntri Rangbah u la khaweh lama ruh ia ka jingpynlait ia kali jong ki 30 tylli na ka bynta ki pulit SF-10 bad la ai khusnam ruh sha ki 10 ngut ki Commando bat bit tam ha ki bynta bapher bapher. La don ruh ka jingpyni nuksa ia ka rukom iakhun lehnoh jong kine ki pulit SF-10.
Ia kane ka kynhun SF-10 la ai jinghikai hapoh ka jingpeit u Brigadier (Retd.) W.B.J Sturgeon ryngkat ka jingiatreilang bad ki shipai bad ki pulit ka jylla Meghalaya.
Ia kine ki Commando yn pyntreikam ban leit iakhun lehnoh bad ki don ruh ba la jied ban peit ia ka suk ka sain bad ia kiwei ki jingiakhih paidbah.