T.6.04 klur ban buh 1000 tylli ki ding sngi, ha WJH

Jowai, 4 Naiwieng:
Ka Ophis u Deputy Commissioner ha West Jaintia Hills ka la ioh ia ka mang tyngka kaba haduh T. 6.04 klur na ka bynta ban buh ia ki 1000 tylli ki ding sngi lane ki LED Solar light lane ka bording ban pynshai lyngba ka bor jong ka sngi.
Ia kane ka skim la mang lyngba ka Ministry of New and Renewable Energy ka sorkar kmie. Kine ki ding sngi, kin ai jingshai ia ki shnong ki thaw ha West Jaintia Hills.
Hapoh kane ka skim yn shna ruh iaka jaka pynmih bording kaba na ka sngi kaba lah ban pynmih haduh 50 kilo watts.
Lyngba kane ka skim ngin pyrshang shwa ban buh ia kine ki light ha ki jaka jngoh kai pyrthei kiba don ha West Jaintia Hills bad kiba tam na kita yn pynbiang sa ia ki shnong.
Kane ka skim kan nym treikam ha Amlarem Sub-Divsision namar ka Amlarem ka la don lypa ka skim kaba kyrpang ban pynshai ia ki jaka jngohkai bad ia ki shnong ki thaw, la iathuh u DC ka WJH, u Arun Kumar Kembhavi.
U DC u la iathuh ruh ba kane ka skim la la wan ha ryngkat ka Subsidy kaba 4.784 klur bad kaba sah , 1.256 klur kan dei ka bhah ba kito ki nongioh myntoi ki hap ban siew.
La iathuh ruh ba ka dor ban pynieng ia kawei ka solar light kan kot haduh 9060 tyngka bad kane ka dor long satia kaba rem. Kane ka bording kan shai hi tang mar syndum ka sngi bad kan lip hi tang mar syn shai ka bneng.