Dawa khot dorbar ka MPF, ban iakren ia ka ILP

Shillong, 17 Naitung:
Ka kynhun liangpyr shah ha iing dorbar jong ka Meghalaya, ka Meghala ya People’s Front (MPF) ka la dawa na u Lamphang ba u dei ban khot ia ka dorbar kyrpang ban iakren ia ka jingmih ki jingdawa na ki paidbah ban pyntrei kam ia ka Inner Line Permit (ILP) ha kane ka jylla ban tehlakam ia ka jingwan tuid ki briew kiba nabar.
“Ka jingma jong kane ka thain North Eastern ka dei namar ka jingwan tuid ki briew kiba nabar khamtam ki nongbylla bad ka long kaba donkam ba u Lamphang un khot ia ka dorbar ban iakren ia kane ka mat” la ong u nongaiktien ka MPF u Bah Paul Lyngdoh ha kane ka sngi Balang.
Haba pynpaw ia ka jingsngew khia ia ka jingwan tuid ki briew ba nabar sha kane ka jylla, kaba long ka jingma ia ka jaitbynriew kaba la ktah ia ka jingdon jong ki trai shnong, u Bah Paul u la ong ba ki trai jaka jong kane ka jylla ki la iakynduh ia ka jingeh na ka jingwan tuid ki briew kiba nabar jylla bad ka long ka jingma ba lada ym lah ban tehlakam, kin sa kylla rit paid ha la kajong ka jaka.
“Ka sorkar kam lah ban pynslem ban pyntreikam ia ki lad ki lynti ban tehlakam ia ka jingwan rung ki briew ba nabar sha kane ka jylla”, la ong u Bah Paul.U la ong ba ka jingkhot ia ka dorbar ba kyrpang jong ka jylla, kan ailad ia ki dkjot ka iing ban iakren shaphang ka jinglong jingman jong ka suk ka sian ha ka thain Garo Hills ruh nalor ka ILP.