“Ka sorkar jylla ka dei ban pynpoi thikna sha ki paidbah”

Shillong, 03 Risaw:
U Myntri sam marbam ka sorkar pdeng u Ram Vilas Paswan u la ong ba ka sorkar pdeng ka la wan buh ia ki marbam haduh jingkhang iing ka sorkar jylla bad ka dei ka kamram jongka, ba kan pynpoi thikna sha ki paidbah ka jylla kiba dei ban ioh ia ki marbam ba la bynta ka sorkar na ka skhim National Food Security Act (NFSA).
Haba kren sha ki nongthoh khubor ha ka jingwan jngoh jongu mynta ka sngi ha ka nongbah Shillong, u Paswan u la ong ba ki paidbah nongshong shnong ka Meghalaya kiba la dei ban ioh ia u khaw reshon (NFSA) ki dei ban ioh biang thik kumba la mang ka sorkar pdeng bad lada don kano kano ka jingleh bakla ne ka jingbym poi, ki dei ban ujor beit sha ka sorkar khnang ba kan leh ia kaba donkam.
“Ngi la pynbiang ia ki marbam ia ki paidbah ka jylla katkum ka jingkhein ba la ioh da kaba wanbuh ei haduh hangne ha kudam ka FCI bad ka dei ka kamra ka sorkar jylla ba kan pynsam thikna sha ki paidbah baroh”, la ong u Paswan.
Haba kylli hato ka don ne em ka jingthut ha ka jingpyndonkam ia ki marbam NFSA ha kane ka jylla, u la ong ba ki don jingujor ba la ioh tangba kane kan shong ha ka sorkar ba ka dei ban pynthikna ba ka jingpyntreikam ia kane ka ain sam marbam kan pynthikna ia ki paidbah ban ioh beit thik ia ka bynta jongki.
U la ong ba ki paidbah ki dei ban phikir ba lada don kiba sam da u marbam bym biang ne kiba bym long, ki dei ban ujor beit sha ka bor ba dei peit.
Halor ka jingkylli ia ka jingpyntreikam ia ka Direct Benefit Transfer (DBT), u Paswan u la ong ban pyntreikam ia kane, ka shong ha ka sorkar jylla. “Lada u Myntri Rangbah u kyrpad ba ka sorkar pdeng kan pyntreikam ia kane, ka sorkar pdeng kam don jingeh bad ka kloi ban leh wut wut”, u la ong.
U la ong ba ka jylla Meghalaya kan ioh khaw tad haduh 21,49,027 ngut ki nongshong shnong kynthup 18, 45, 542 lak ha jaka nongkyndong bad 3,03,485 ngut ha jaka sor ha ka jingbun ba 5 kilo shi khlieh ha ka dor T. 3 shi kilo u khaw, T. 2 shi kilo u kew.
Ka Meghalaya ka bam khaw 12081 metric ton man u bnai, kyntup 524 metric ton u khaw AAY, 10476 metric ton u khaw.