Leit peit ki khynnah skul ka Bangladesh ia ka Mawlynnong

Shillong, 3 Risaw:
Shuwa ban poi sha Shillong, mynhynnin ka sngi ki khynnah skul na ka ri Bangladesh ki la leit peit kai ia ka Mawlynnong ka shnong kaba khuid tam ha ka dewbah Asia, bad ha katei ka juh ka sngi ki la leit ruh ban iaid sha jingkieng jri kaba don ha ka shnong Ri-wai kaba mar jan bad ka Mawlynnong. Hadien katei ki la kiew noh ban leit sha ktem ki shipai BSF sha Umpling.
Kitei ki khynnah bad ki nonghikai skul na Bangladesh kiba la wan ryngkat bad ki heh shipai BGB ki la sahmiet ha nongbah Shillong bad mynta ka sngi ki la ioh ban ia shim bynta ha ka prokram kaba la long ha nongbah Shillong kaba dei ka prokram ia lehkmen ban pyni markylliang ia ki kolshor jong ki.
U heh ka Border Guards of Bangladesh (BGB) u Lt Col Md Akhton Iqbal u la ong ba katei ka prokram ba la pynlong ka dei ban pynkhlaiñ ia ka jingiadei hapdeng ar tylli kitei ki Ri, lyngba ki shipai BSF bad BGB.
U Iqbal u la ialam 30 ngut na Bangladesh bad 26 ngut na ki, ki dei ki khynnah skul jong ka BGB katba na Shillong pat kiba la shim bynta dei ki khynnah skul ka BSF Senior Secondary School, Umpling.
Kane ka dei ka sien ba nyngkong ba la wanrah ia katei ka prokram. U PRO ki BSF u S.K Singh u la ong ba ki shipai BSF ruh kin leit ialam 30 ngut nangne na India sha Bangladesh bad kitei kin kynthup ia 26 ngut ki khynnah skul, 2 ngut ki khynnah skul ka Bangladesh ki pynpaw ba ki kwah ba ka India ka dei ban shah ia ki khynnah ka Bangladesh ban wan skul sha India bad ki khynnah nangne ruh dei ban pyllait ba kin leit skul sha Bangladesh.
Kitei ki khynnah na Bangladesh kin sah ha nongbah Shillong haduh ka 5 tarik mynta u bnai.