Ka NDA kan shim ia ka bor synshar ha u 2018, ong u Paswan

Shillong, 03 Risaw:
U Myntri sorkar pdeng u Ram Vilas Paswan u la ong ba ka Congress ka la nang hiar ha ka ri baroh kawei bad ha kane ka jylla ruh ha ka elekshon MLA ban long ha u 2018, kan sa duh noh ia ka bor synshar ha kaba ka kynhun NDA kan shim ia ka bor.
Haba kren mynta ka sngi sha ki nongthoh khubor, u Paswan u la ong, “Ha ka ri baroh kawei ka Congress ka la nang hiar arsut bad khlem pep ha kane ka jylla ruh kan sa duh noh ia ka jingsynshar ha ka elekshon ban wan”.
“Ngi kyrmen skhem ba ka kynhun bym dei Congress kan ioh knieh ia ka bor ha kane ka jylla Meghalaya ha u 2018”, la ong u Paswan uba la don ha ka nongbah mynta ka sngi.
U Paswan u dei u nongialam ka LJP ka seng kaba don ha ka kynhun jong ka National Democratic Alliance (NDA) kaba ialam da ka BJP.
Ha kane ka jylla, ka UDP ka dei ka seng riewlum kaba heh tam ha ka jylla kaba don ka jingiadei kaba kham iajan bad ka kynhun ka NDA ha kaba ka la don ruh ha ka kynhun NEDA (North East Democratic Alliance) kaba dang shu thaw shen ha une u snem ban kdup ia baroh ki seng bym dei Congress.
Ka jingthmu jong ka NEDA ka long ban pynlait ia ka Dong Mihngi na ka kti ka Congress kaba bat ia ka bor synshar ha kiba bun ki jylla ha kane ka thain haduh kine ki sngi, kyntup ha Meghalaya.