Pyllait im u heprit ia u khunlung

Nongpoh, 02 Risaw:
Ki kam ba shlur jong uwei u heprit Robert Manih ba dang 8 snem karta, ki la paw pyrthei hadien ba u la lah ban pyllait im ia la u para ba dang 1 snem 7 bnai, hadien ba utei u para u la ngam jyllop ha kawei ka pung kaba don ha ka shnong Umkon, Ri Bhoi District.
U heprit Robert Manih, u khun jong u Ritu Soliha bad ka Kong Therisia Manih na ka shnong Umkon, u dei u khynnah ba dang shong ha ka klas 1V ha ka skul Sohtad L.P School, kaba don ha katei hi ka shnong, u la pyllait im ia u Olbor Manih, uba dei u para trai jong u.
Katkum ka jingiathuh da u Freewell Manih, u kni jong u heprit Robert Manih, la ong ba katei ka jingjia ka la jia ha ka 24 tarik u Nailur ha ka por 12 baje mynsngi, haba u heprit Robert Manih u dang wanphai na skul bad tang mar ia poi ha iing utei u heprit u la wad ia la u jong u para bad ha katei ka jingwad jong u, la shem ba u para u la ngam ha katei ka pung, hynrei da ka jingshlur khlem da khein shuh ialade u heprit Robert Manih, u la ngam sha katei ka pung na ka bynta ban sei bad pyllait im ia la u para.
U Bah Freewell Manih, u la ong ruh ba ka daw kaba la pynlong ia utei u khynnah ba u hap ha katei ka pung ka dei namar ka jingleh khlem akor da u Kontrak uba pyntrei ia katei ka pung, namar ia katei ka pung la dep ban tei ia ka Common Facility Centre na ka Weaving & Sericulrure, Nongpoh. Hynrei la shu ieh kumto khlem da don ki jingker kiba biang.
Shuh shuh, u la iathuh ruh ba ki kmie ki kpa kim tip ba utei u khunlung u la ngam ha katei ka pung, hynrei ki kyndit tad haduh ba u Heprit Robert Manih, u la dep ban sei na katei ka pung bad wanrah sha iing ia uteu u khunlung hapdeng ka jingbym tipbriew bad ka jingjhieh baroh shi rynieng, ong u Bah Freewell Manih.
Kumta tang hadien kane, kiba haiing watla hapdeng ka jingduh mynsiem na ka bynta utei u khunlung u bym tip briew shuh, wut wut ki la wanrah sha Bethany Hospital, Nongpoh, na ka bynta ban ioh ia ka jingsumar bad kumta hapdeng ka jingsumar da ki Doktor ka Bethany Hospital, utei u khunlung u la sdang ban kyndit bynriew bad iohbor, u la bynrap.