Mynta ka dorbar bah ki shnong ba pyrshah maw nongrim

Shillong, 30 Nailur:
Ka Seng Khihlang ka la pynrem jur ia ki kynhun kiba la khang pyrshah ia ka jingthmu jong ka Seng Khasi, Mylliem ban plie ia u Mawnongrim ha Iew Mylliem Rim ha ka 24 tarik mynta u bnai na ka bynta ban shna ia ka Kpep Thangbriew.
Katkum ka kyrwoh khubor na u President ka Seng Khihlang u bah H.R Kurbah u la ong ba ka seng ka sngewkhia haduh katta katta ia ka jingphlan duman im-im peitpeit kaba la pynmih ha U Rupang ha ka 25. 09. 2016 kaba la ong ba kitei ki kynhun kim don jingtip ei ei halor ka jingthombor, jingpynjot pynpra ia u Mawnongrim bad jing-pynbyrsieh byrsang ia ka duwan lehniam ha katei ka sngi bad u la ong ba kane ka kampap kamsang ka la jia tang hapoh khyndiat minit hadien ba ki briew jong ka seng Khasi ki la mih na katei ka jaka hadien ka jinglehniam bad ba kane ka jingjia ruh ka la jia ha ka por ba ki pulit ruh ki dang iadon bad pahara ha kata ka por bad ka jaka.
Ka kyrwoh ka la ong ruh ba Riti Synshar jong ka Ri India ka khang pyrshah ban thombor ne pynbyrsieh byrsang ia kano kano ka jinglehniam bad kumta u la ong ba katei ka jingjia ka long ka jingleh beaiñ kaba dei ban pynrem da baroh. Khnang ban wanrah ia ka shongsuk shongsaiñ ha ka imlang sahlang ka Seng Khihlang ka la kyntu jur ia ka sorkar ban pynjem khnap ia kiba donkti ha katei ka jingjia katkum ba shong ka aiñ.
Ha kawei pat ka khubor, la ong ba kan don ka Dorbar bah jong ki saw tylli ki shnong lashai ka step ban ia kren ia katei ka kynrum kynram hapoh Mylliem. Kitei ki saw tylli ki shnong ki ban ia shong dorbar ki long ka Syllai-Ulor, Kyndong –Nongkyntir, Rngi bad Mawiong.
Lah ban kdew ba ha ka 24 tarik u nailur ka Seng Khasi Mylliem ryngkat ka jingdonlang ka Sengbah Ki nongshat nongkheiñ ha ryngkat u Lyngdoh ka Raid Mylliem ki la leit sha Mylliem ban plie donburom ia u mawnongrim ka Seng Khasi na ka bynta ban shna ia ka kpep Thangbriew hynrei haba ki la poi ha katei ka jaka ki la don ki kynhun kiba khang pyrshang ban plie kumta ka Seng Khasi ka la pyndep tang ka niam ka rukom bad ki la leit noh hynrei kham hadien ki la ioh jingtip ba u mawnongrim u la shah pynpra, ki pylleng kñia ba buh ha ka jaka lehniam ki la shah pynpat bad ka plastic tap mawnongrim ka la shah thang.
Hadien ba la lap ia katei ka jingjia ha katei hi ka sngi ka Seng Khasi ka la leit ujor ejahar sha ki pulit ka Mawngap Out post.