“Ki Congress ruh ki ong ba kim wan shuh ha ka bor ha u 2018”

Shillong, 30 Nailur:
U President rangbah duh ka UDP u Dr Donku-par Roy u la ong ba ha ka elekshon 2018, ka pali kan dei ia ki seng bym dei Congress ban bat sha u shabuk ka bor synshar ha kane ka jylla Meghalaya bad kana ka la paw katkum ka sur jong u paidbah.
“Wat ki Congress hi ki ong ba kin nym wan shuh ha ka bor synshar ha u snem 2018”, la ong u Dr Donkupar haba kren ha ka jingialang pynskhem ia ki nongkitkam ka UDP Mawsynram circle kaba long ha kane ka sngi Palei.
U Dr Donkupar uba long teng u Myntri Rangbah ka jylla, u la ong ba ka Mawsynram ha u snem 2018 kan dei jong ka UDP bad kane kan urlong lyngba ka jingtrei radbah jong ki nongkitkam naduh barit haduh baheh ban wanrah ia ka jingkylla.
U la ong ba mynta ka Congress ka la don hapdeng ka jingiapait iapra para maki, ha kaba la mih bun kynhun. Tang na Mawsynram ruh ki paidbah kila tip ia ka Congress haduh ba la wanrah ia ka jingkulmar ia ki paidbah.
Watla ka UDP kam pat pynbna ia u kyrtong, hynrei na ka liang u Dr Donkupar u la ong ba ka party kan sa sei ia u kyrtong uba radbah ban shakri ia ki paidbah ka thain ynda la dei ka por.
“Phi la tip baroh, u kyrtong u la don hynrei ngin ap ia ka por ban pynbna paidbah”,la ong u Dr Donkupar.
Katba u General secretary ka UDP u Dr Jemino Mawthoh u la ong ba ka ri India baroh kawei, ka la kyntait iaka Congress bad mynta ka Congress ka don tang 44 ngut ki MP ha Parliament kaba ju jop haduh 2-3 spah ngut.
“Ka elekshon 2018, kan dei ka jingkylla ha kaba ka bor synshar ha kane jylla, kan long ban ialam da ki seng riewlum ia ka sorkar”, la ong u Dr Mawthoh.
La ioh ruh ia ka jingkren na u Secretary ka UDP Youth Wing u Bah Hamletson Dohling uba la ong ba ka daw ba ka jingjied jongu ban iasoh bad ka UDP ha u snem 2012 naduh ba u la sangeh ban shakri bad ka KSU, ka dei halor ka nongrim ba ka party kaba heh duh bad kaba don ka nongrim na ka jingdon jong ki nongialam ba shemphang.
La ioh ruh ia ka jingkren na u Secretary ka UDP East Khasi Bah Teinwel Dkhar bad ia ka jingialang la pyniaid da u President ka District Bah Titosster Well Chyne ha ka jingialang kaba la wan ki dkhot ka UDP Mawsynram circle.
Ha kane ka sngi, u president u Dr Donkupar u la pynskhem ruh ia ki nongkitkam ka UDP Mawsynram circle ba kynthup President Bah Devanan Nongsiej, Secretary Bah Histerly Basan, Working Presidents: Bah Robert Ronbon, Phres Rumnong, Beniwel Wanniang, Lamphang Umsai, RD Shira, Hamarson Thongni. Ha ka Youth Wing la jied ia u Bah Skhemkupar Rynjah bad secretary Bah R Kharbani.