Kyrshan U MR, ba hiar thma ka India

Shillong 30 Nailur:
U Myntri Rangbah ka jylla u Dr Mukul Sangma ula iaroh ia ka sorkar ba ialam da u Myntri Rangbahduh ka ri u Narendra Modi halor ka jinghiar thma jong ki shipai India ia ki ktem lehnoh sha Pakistan lyngba ka ‘Surgical Strike’.
Haba twad jingmut ia ka jingsngew jongu halor kane, u Dr Mukul ula ong, “Kano kano ka jingleh ka sorkar pdeng kaban long na ka bynta ka jingbit jingbiang ka ri bad ki paidbah, dei ban ioh ia ka jingiaroh”.
U la ong ba ka jing-jia ha Kasmir ka iasyriem bad ka jinglong jingman ha kane ka Dong Mihngi kaba iakynduh ia kum kane ka jingeh namar ka jingdon jong ki riew pyrshah ri.
Ka India ha kane ka sngi Balang ka la pynlong ia ka jinghiar thma kynsan sha ktem ba shong ki lehnoh sha jaka ka Pakistan da kaba jam palat ia u Line of Control (LoC) kum ka jingsiew kylliang ia ka jingshah pyniap 18 ngut ki shipai ha Uri, Jammu & Kashmir ha kine ki khyndiat sngi ba la dep.
Ym tang u Myntri Rangbah kane ka jylla ba synshar ka Congres, hynrei kiwei ki myntri rangbah bad ki nongialam ka Congress kum u Rahul Gandhi, Sonia Gandhi, u Laloo ka Bihar, bad kiwei, kila kyrshan bad iaroh ia ka rai shlur jong u Modi ban pyni da ki kam ia ki riew ialeh pyrshah ka India kiba kyrshan da ka Pakistan.