T. 50 lak shisnem, ai bai bam ka Border Area ia ki samla pule 3rd Division T.50, 2nd Division T.100 & 1st Division T.200 shi bnai

Shillong, 16 Naitung:
Ka tnat jong ka Border Area Development Meghalaya, ka ai bai bam man u snem ia ki khynnah kiba sah ha khappud jong ka border, ha ka jinglut, ka poi kumba T.50lak ha ka shisnem shisnem. Mynta u snem ki don haduh 3600 ngut ki samla pule kiba dei na ka thain khappud ha kane ka jylla Meghalaya.
Ka Director jong ka Border Area ka Kong RM.Kurbah, ka la iathuh ba ka jingai Scholarship ne baibam ia ki samla pule ka long tang na ka bynta kito ki khynnah kiba sah ha ki thain khappud. Ka jingai bai bam la phiah katkum ka kyrdan jong ka jingpule jong ki bad katkum ki division ba ki ioh ha ka eksam jongki ba la pyniaid da ki Board bapher bapher ha kane ka jylla bad shabar ruh, haba iakren bad u Rupang ha kane ka sngi Hatmajai.
Ia ki khynnah pule jong ka SSLC bad HSSLC ki ba poi ha ka kyrdan 1st division la ju ai T.200, ki 2nd division ki ju ai T.100 bad ia kiba poi ha ka 3rd division la ai tang 50 tyngka, la ong ka Director.
Haba khein kyllum ki 3rd division ki ioh T.600 ha ka shi snem, ki 2nd division T.1200 bad ki 1st division ki ioh T.2400. Kane ka baibam ka la dei kaba la buh dor da ka sorkar naduh ki por mynshwa kaba kham slem bha.
Ka tnad Border Area ruh ka ju ai bai bam ia ki samla kiba pule ha ki kyrdan MA, MCOM, MSC la ai T.400 shi bnai bad ha ka shisnem ki ioh T.4800. Kito kiba pule ha ka kyrdan jong ka Engineering & Medical kane ka tnad ka T.500 shi bnai bad ha ka shisnem ka long T.6000.
Ka Director ka la iathuh ba ka tnad jong ka Border Area, ka la ai sha ka tnad jong ka pule puthi jong ka jylla ba kan sam sha ki samla pule kiba na ki kolej bad ki skul bapher bapher kiba don ha ka jylla Meghalaya.
Ka la iathuh ruh ba kito ki samla ban pynshisha ia lade ba ki dei kiba sah ha ki thain khappud jong kane ka jylla kidei ban submit ia ki dur thep vote (EPIC ).
Ka la iathuh ruh ba katkum ka kyndon, ia kito ki shnong kiba don hapoh 10km na zero line ki la hap ha ka border area ne thain khappud. Kane ka dei ka kyndon jong ka sorkar India, la ong ka Director ka tnad border area ka jylla.