Bun kiba pan tiket MDC elekshon shiteng samoi, ong u President BJP

Shillong, 28 Nailur:
U President ka BJP Meghalaya u Bah Shibun Lyngdoh u la ong ba ki don bun ki briew ba la ia pan tiket na ka seng na ka bynta ban iakhun ia kane ka elekson MDC shiteng samoi hynrei ka seng, ka dang bishar bha ia ki shwa ba kan ai ne em.
Ha ka jingiakren ha kane ka sngi Balang, u Bah Shibun u la ong, “Ki don bun kiba pan tiket na ka party na ka bynta kane ka elekshon MDC shiteng samoi hynrei ym pat lah ban pynbna namar ba yn sa shong jingialang shwa ha kine ki khyndiat sngi”.
U la ong ba mynta um pat don ha Shillong bad ha kine ki ar sngi lai sngi ban wan, ynda u la poi ha Shillong un shong jingialang ban iapyrkhat ia kane ka kam.
Katkum ka jingtip la iathuh ba ka BJP ka don ki briew na Mairang, Sohiong, Laban, na Mawthadraishan bad ruh na Rambrai kiba kwah ban iakhun na kane ka party hynrei ym pat lah ban ong eiei namar ba kan shong haka party ban shim ia ka rai.
Ha kawei ka liang, u president ka BJP u la ong ba ka bor pyniaid jong ka party kan sa pynbujli nongkitkam noh shen ia kiba bat ia ki kam bapher bapher ha ka party naduh ki district, mandal, kynthup kiba don ha ka State level lait noh u President.
“Kane ka jingpynbujli ia ki nongkitkam ka long katkum ka jingpeit bad ka jingpyniaid ka party”, la ong u Bah Shibun.