Rai ka Ri Bhoi Synod ban iasnoh kti lang ia ka Swacch Bharat Mision

Nongpoh, 27 Nailur:
Shi bynta ban iasnohktilang halor ka jingthmu jong ka sorkar kmie ban wanrah ia ka khuid ka suba lyngba ka Swacch Bharat Mission, mynta ka sngi ka General Department ka Ri Bhoi Presbyterian Synod, hapoh ka lama jong ka Ri Bhoi Presbyterian Synod, ki la pynlong ia ka Seminar ba shisngi kaba dei ka jinghikai halor ka jingkordor jong ka jinglehkhuid (Cleanliness) ha RBPS Vocational Training Centre, Umta Nongthymmai.
Ha kane ka sngi la wan ban iashim bynta ruh da u Bah Jubanlang Kharbihkhiew, uba dei u ophisar na ka State Rural Employment Society, Meghalaya, kum u kongsan, ha ryngkat ka jingdonlang ki Pastor ba rangbah ka Ri Bhoi Synod, ba kynthup naduh u Pastor H.L Marsing, Pastor L.S Nongphlang, Pastor F.W Shadap, Pastor K.P Masharing.
La pynphuh pynphieng ruh ha kane ka seminar da ka jingiashimbynta lang naduh ki pastor, ki pro-pastors, ki nongialam niam lem bad ki khynnah skul ka Umta Secondary School.
Haba kren kum u kongsan, u Bah Jubanlang Kharbihkhiew, u la pynpaw ia ka jingkmen kaba khraw halor ka jingshimkhia ki nongkitkam ka Ri Bhoi Synod ban pynlong ia kiba kum kine ki jingai jinghikai kaba iadei bad ka jinglehkhuid, kaba long ruh kawei na ki mat ba kongsang eh ka ha baroh ki bynta jong ka Ri ki dang iaksaid, khamtam eh haba iadei bad ka thong ia kaba la buh da ka sorkar kmie, lyngaba ka ‘Swacch Bharat Mission’.
Ha kane ka sngi u Bah Kharbihkhiew, u la aiti ruh ia ka kot kaba batai shai shaphang ka jingkordor jong ka jinglehkhuid ba katkum ki jingbatai na ka ‘Swacch Bharat Mission’ sha ki nongkitkam ka Ri Bhoi Presbyterian Synod, ia kaba yn sa shna kham pynjanai shuh shuh da ki nongkitkam ka Ri Bhoi Synod, hashwa ba kin pyllait paidbah.
Ka la don ruh ka jingiatai paidbah halor ka jingkordor jong ka jinglehkhuid, kaba la iashim bynta da baroh kat kiba don ha kane ka sngi, ha kaba na ka liang ki nongkitkam ba rangbah ka Ri Bhoi Synod, ki la shim ruh ia ka rai ban kin ia trei ryngkat ryngkat bad ka sorkar, na ka bynta ban wanrah ia ka jingkhuid ha baroh ki shnong kiba don ha Ri Bhoi.
Kumta khnang ba ka jingthmu ban wanrah ia ka jinglehkhuid lyngba ka ‘Swacch Bharat Mission’ kan long kaba jop, ki nongkitkam ka Ri Bhoi Synod, kum ki nongialam niam ki la rai ban pynlong syndon da kata ka ‘Week Cleanliness’, ka ban sa iashim bynta da baroh ki paidbah ka Balang Presbyterian kiba hap hapoh ka Ri Bhoi Presbyterian Synod.