Kurup ki BSF ia ki dieng khaïi tuh ba shongdor T.17 lak tyngka

Shillong, 26 Nailur:
Ka pyrton ki shipai BSF 11 Bn kiba don ha Dulainala,South West Khasi Hills ki la ioh kurup 196.78 Cft ki dieng ba thmu ban khaïi tuh sha Bangladesh, kiba shong dor haduh T.17 lak tyngka,ki laioh bat ruh ar tylli ki Bolero Pick Up kiba kit ia kitei ki dieng hynrei ki nongniah ki la ioh phet krad noh ha ki khlaw ba rben. Ki BSF ki la ioh kem ia kitei ki dieng ha ka por ba ki dang iaid pahara ha u Zero Line bad ki la iohi ia kitei ki Bolero kiba I don jingsuba sniew bad haba ki tur shajan kitei ki Bolero ki la pyrshang ban phet krad bad ki la kthong ha ban da lap hynrei ki nongniah ki la phet krad noh pynban.
Katkum ka jingiathuh ki shipai BSF ki la ong ba mynta ki por ka jur bha ka jingdawa dieng na Bangladesh bad de ina katei ka daw ki nongkhaii tuh ki shlur ban leh ia katei ka kam. Ia kitei ki dieng la ong ba la wanrah na ki thaiñ Mawsynram ban pyniaid sha Bangladesh lyngba ka Naukaria Nullah. Ha kine ki taiew ba la dep ki BSF ki la ioh kurup 999.224 Cft kiba shong dor T.33 lak tyngka kiba la thmu ban pyniaid lyngba ka wah Simsang, South Garo hills. Ia kitei ki mar ba la ioh kurup la aiti noh sha ki tnad ba dei peit ban leh ia kaba donkam.