Lada ker sainar 150 yard, ka Dawki bad Muktapur kan leit sha Bangladesh

Shillong, 26 Nailur:
Ka kynhun ki Khlieh nongsynshar shnong, ki trai khyndew bad ki sengbhalang ki la dawa na ka sorkar ba ka dei ban pynsangeh noh shuwa ia ka jingsorbe naka bynta ban ker sainar shiah ha khappud ka India bad Bangladesh. Ki la dawa ruh ba ka sorkar ka dei ban weng noh ia ka jingpynjari section 186 IPC kaba la khang pyrshah iano iano ruh ban leit pynwit ia ki nongtrei sorkar kiba don ha ka kam jong ki ha khappud.
Lah ban kdew ba ia katei ka hukum la pynmih da u Deputy Commissioner ka West Jaintia Hills u Arunkumar Kembhavi shuwa ba ka sorbe kan sdang ha ka 14 tarik mynta u bnai bad kan kut noh ha ka 30 tarik.Lada ka sorkar kam shah shkor ia kitei ki jingdawa kitei ki kynhun kiba don hapoh kawei ka kynhun kaba la tip kum ka Coordination Committee on International Border (CCIB) ki la byrngem ban shim da ki lynti ia khih.
Haba kren sha ki nongthohkhubor mynta ka sngi u nongaiktien katei ka kynhun u bah G.H Kharshanlor u la ong ba katei ka jingkwah u DC ban pynsted ia ka jingker sainar shiah ha khappud ka long kum ka jingniew beiñ ia ki nongshong shnong kiba sah ha khappud kiba la shah ktah. U la ong ba ka CCIB ka pyrshah jur ia katei ka jingpynjari section 186 IPC jong u DC kaba long pyrshah ia ka hok ki nongshong shnong ba shah ktah, ki bym shym la ju pynwit ia katei ka jingiaid sorbe ki briew sorkar.
U bah Kharshanlor u la ong ba katei ka kynhun kan leit ban ia kynduh ia u Lat ka jylla kumjuh u myntri rangbah ka jylla ha kaba ia dei bad katei ka kam. Haba byrngem ban shim da ka lynti ia khih lada ka sorkar kam shah shkor ia kijingdawa u la pyntip ba ha ka 1 tarik u risaw kan don ka jingialang bah ha Dawki ban pyrkhat na bynta katei ka kam.
U samla Daniel Khyriem President ka KSU u la ong ba ka CCIB, ka dawa ba ka sorkar ba ka dei ban sangeh noh shuwa ia ka jingsorbe kaba ka la leh khlem ka jingtip ki trai jaka. U la ong ba haba sorbe dei ban leh ryngkat ka jingiatiplang ki nongshong shnong ba shah ktah bad ki trai jaka. “Ngi la rai ban kyntait ia ka ripod jong katei ka jingsorbe” u la ong.
Katkum ka jingiathuh ki nongialam ka CCIB ki la ong ba lada shah ban ker sainar shiah ha ka jingjngai kaba 150 yard ka Dawki bad ka Muktapur kan leit sha Bangladesh. U Secretary ka CCIB u bah Kmen Myrchiang u la pynrem jur ia ka JHADC kaba la ai NOC ban leh ia ka sorbe khlem ka jingtip lang ki khlieh nongsynshar shnong.