Shibnai duna ai por ka High Court ia U bah Adelbert

Shillong, 23 Nailur:
Ka Meghalaya High Court mynta ka sngi, ka la ailad shibnai duna, ia U Bah Adelbert Nongrum, Chief Executive Member barim jong ka Khasi District Council, ba un jubab, halor ka jingthoh bad ka jingpynshai, kaba la phah da ki san ngut ki dkhot jong ka seng HYC sha ka Kashari.
Ka Kashari, kan ia kynduh biang ha ka 21tarik Risaw.
U Bah Adelbert, u don mynta ka sngi ha Kashari bad kitei ki san ngut, ki dkhot jong ka Hynniewtrep Youth Council (HYC), ki don lang mynta ka sngi bad ki la phah ia ka jubab jongki sha ka Kashari, ha kaba ki pynpaw, ba ki sngew babe bad ki pan map ruh halor ka jingleit jongki sha Kashari, ha ka por ba tian bishar ia U CEM barim.
La kynnoh ba kitei ki san ngut, ki dkhot jong ka HYC, ki la ia hylla ha khmat jong ka Kashari, ha ka por jong ka jingleit shah bishar jong U bah Adelbert Nongrum bad kumta, ki la shah kynnoh, ba ki leh pyrshah ia ka rai jong ka High Court.
La ai ia kitei ki jingthoh jong ki san ngut ki dkhot jong ka HYC sha U VK Jindal, u riewsaid jong ka CBI bad kumjuh sha U bah ND Chullai, uba dei u riewsaid jong ka sorkar Jylla.