Sdang ka jingrakhe 50snem, ka Kiang Nangbah Government College

Jowai, 18 Nailur:
Ka Kiang Nangbah Government College, Jowai mynta ka sngi Saitjain ka la sdang ban rakhe ia ka lyngkhuh snem ba 50 snem ka jingshakri ha ka pule dangle ha rilum Jaintia.
Ka jingrakhe ia ka jubilee ksiar kan long shi snem lynter halor ka phang, “Dream, Believe and Achieve”.
Haba plie ia katei ka Jubilee Ksiar, u myntri rangbah ba ar, U Prof. RC Laloo u la long u kongsan bad u Director ka Higher & Technical Education, u Ram Singh u la long u symbud kongsan. La iadonlang ki nonghikai ba la shongthait, ki Principal barim, ki dkhot ka Alumni Association ka College nalor ki sahep sorkar ba ka tnad bapher bapher.
Haba kren, u myntri rangbah ba ar, u la pynpaw ia ka jingsngewkmen ban ioh ban donlang ha katei ka sngi ban sdang ia ka jingia rakhe ia ka Golden Jubilee katei ka College.
“Kane ka College ha ki 50 tylli ki snem ka la pynmih shibun ki briew khraw ka ri Jaintia”, la ong u Dr. Laloo.
U Professor RC Laloo u dei ruh u ba pule ha kane ka skul ha shwa ba un bteng ia ki jingpule jong u ha skul bah NEHU
U Ram Singh pat haba kren u la ong haba rakhe ia ka jubilee ksiar kane ka College ka donkam ban kyntiew ia kane ka College ym tang ha ki jingpule hynrei ha ki kam ialehkai bad kiwei kiwei.
Ha ka pyrthei kyrduh kam sorkar, kam long ka jingmyntoi ia ki samla lada don kiwei pat ki rukom hikai ba bunjait ha kane ka College khnang ba ki samla kin lah ban ieng ha la ki kjat ha ki kam la jong lane ha ki company bapher bapher.
Na ka liang u President ka AlumninAssociation, u ma BN Lamare uba dei ruh u Principal barim kane ka College u la ong ba ka jingthmu ba kongsan ka Alumni Association ka long ban pynshlur ia ki samla pule ban pyndonkam hok ia kaba ki ioh na katei ka college lada kadeinha ki jingpule, jingialehkai lane ha kiwei kiwei ki jait kam.
“Ka jingthmu ba kongsan ka Alumni Association ka long ruh ban don ka jingiajan bad ki Bor pyniaid College khnang ban dup lah ban kyntiew ia kane ka jaka pule sorkar ha Jaintia Hills”, la ong u ma Lamare.
U la kyntu ruh ia baroh ki dkhot ka Alumni bad ruh ia baroh kito kiba la pass na kane ka College ban ai ka jingiatreilang ban kyntiew shuh shuh ia kyrdan jong katei ka college.
Ka Kiang Nangbah Government College ka dei kaba la seng ha u snem 1967 ha ka kyrteng jong ka Jowai Government College hynrei hadien pat la kylla ia ka sha Ka Kiang Nangbah Government College.
La sdang ia katei ka College ha iing wai tang da 7 ngut ki nonghikai bad mynta ka don haduh ha ki 6 sobject.
Mynta katei ka College ka don haduh 97 ngut ki nonghikai ha ki15 tylliki subject bad ki don haduh palat 4000 ngut ki ba pule ha kane ka College.