Hadien 52 sngi pyllait im ia uba shah rahbor

Shillong, 16 Nailur:
Hadien 52 sngi ba u la shah rahbor ki pulit ki la lah ban pyllait im biang ia uwei u rangbah bad mynta u la wan phai ing. Katei ka jingjia ka dei ha ka 26 tarik u Naitung, 2016 ha kaba ki pulit ki ioh jingujor na ka Smt.Sunita Das ba u lok jong ka u Arabindra Kr.Das,77 snem karta u la mih na la iing ha ka 25 tarik u naitung ha ka por 5 baje mynstep ban leit mareh step hynrei umwan phai ing shuh.
Ha ka por 7:15 baje mynmiet la don ba phone sha ka khun jong u ka Smt. Ampa Das kaba shong ba sah ha Pune ba ladon ba rahbor ia u kpa jong ka. La rejistar ia katei ka kam ha Sadar PS vide Case No. 214(7)16 U/S 364(A)/34 IPC. La dawa T.2 klur tyngka na ki bahaing hasem ba kin pyllait ia utei uba shah rahbor. Namar ba ka buh jingma ia utei uba shah rahbor ym shym la pynbna paidbah eiei. Ki pulit SOT ryngkat bad ki pulit ka Assam, ki la trei ryngkat ryngkat ban ioh pyllait im ia utei u briew.
Dei ha ka 15 tarik mynta u bnai kata hadien 52 sngi, la ioh ban pyllait im ia u Das katba ki nongrahbor ki dang kit ia u hapoh kawei ka kali Maruti Van. Ha katei ka jingjia ki pulit ki la ioh kem ia uwei u briew uba la tip kyrteng kum u Nurul Haque na Gamari, Ramkrishna Nagar, Karimganj uba donlang bad u Das. Haduh ban da ioh pyllait im ki ba haing hasem kim pat siew pisa sha ki nongrahbor, ki pulit ki dang tohkit ban lap ia kiwei pat kiba donkti.