Pdiang ka kabinet ia ka Bill ki Parliamentary Secretary bad Service Rules ki shakri sorkar

Shillong, 14 Nalur:
Ka kynhun myntri mynta ka sngi ka la pdiang ia ka Meghalaya Parliamentary Secretary (Appointments, Salaries, Allowances & Miscellaneous Provisions) Amendment Bill, 2016 bad ka Legislative Assembly of Meghalaya (Members’ Salaries & Allowances) Amendment Bill, 2016, ban leit rah ha kane ka dorbar kaba dang iaid mynta ban ioh ia ka jingmynjur.
Ka jingialang ka la pdiang ruh ia ka Meghalaya Service Conduct Rules kaba kynthup ia ki Nongsynshar shnong, ki sengbhalang kiba hap mynshwa shabar kane ka rule.
Haba kren hadien ba la wai ka jingialang, u Myntri Rangbah ka jylla u Dr. Mukul Sangma u la ong ba ia ka Meghalaya Parliamentary Secretaries’ Appointments, Salaries, Allowances & Miscellaneous Provision Amendment Bill, 2016 la pdiang bad yn leit rah ha iing dorbar ban ioh jingmynjur namar ba kham mynshwa ka sorkar ka la pynbna ha ka dur ka Ordinance bad donkam ban mynjur ka iing dorbar ban pyntreikam pura ia ka.
Ka jingpynkylla ia kane ka long haka Sections 5, 6 bad 6(a) bad ruh ha ka Sec 3 nalor ka Sec 6(a) bad pynduh ia ka Sec. 8.
Ka jingthmu jong kane ka long ban ai ia ka jingshai halor ka jingthung ia ki Parliamentary Secretaries, ka tulop jongki bad kiwei ki jingioh, khnang ban lait na ka jingsah umdum.
U Myntri Rangbah u la ong ba ha kaba iadei bad ka tulop jong ki Parliamentary Secretaries kan long katkum ka Legislative Assembly ka Meghalaya Members’ Salaries & Allowances Act, 1972.
Ha kaba iadei bad ka Legislative Assembly of Meghalaya Members’ Salaries & Allowances Amendment Bill, u myntri sorkar ba peit ia ka Parliamentary Affairs, u M M Danggo u la ong ba kane ka ain 1972, ka la ai ba ia ki MLA ka bai shong dorbar ka longT.200 hynrei mynta la pynkiew sha ka T. 600.
Ha kawei ka liang u Myntri Rangbah u la ong ba ka sorkar ka la pdiang ia ka jingpynkylla ia ka Meghalaya Service Conduct Rules, kaba pynthikna ba ki nongtrei sorkar ki dei ban ai jingtip sha ka sorkar haba ki kit ia ki kam ha ka seng ne ka kynhun.
Lyngba kane ka jingpynkylla, ki nongkitkam jong ki kynhun niam, ki seng kur, bad ki dorbar shnong kin lait na ka jingshim kyrteng ka sorkar. U Myntri Rangbah u la ong ba ha kano kano ka bynta lem bad kiwei ki kynhun, ka kyrteng ‘dorbar shnong ka paw ba la pynduh ne pynlait na ka ain.
Kane ka long ka jingleh ka sorkar hadien ba la iathir bad ka kynhun jong ki rangbah shnong kaba long katkum ka jingkwah jongki.