Sahteng 4 tylli ki iew khappud bym ioh jaka, ong ka sorkar

Shillong, 14 Nailur:
U Myntri Rangbah ka jylla u Dr Mukul Sangma ula ong ba ka sorkar kam pat lah ban sdang ia ka jingtei ia ki iew khappud ha ki saw tylli ki jaka ha ka jylla bad ka daw ka dei namar ba shitom ban ioh jaka.
Haba jubab ia ka jingkylli mynta ka sngi ba la wanrah da u MLA ka Sohra u Bah Titosstarwell Chyne hapoh ka iing dorbar, u Dr Mukul u la ong ba ki saw tylli ki jaka ban plie iew khappud ki long ha Bholaganj, Ryngku kiba hap ha East Khasi Hills, Malikata ha South West Khasi Hills, bad ha Shibabari ha South Garo Hills.
“Ia ka pisa la dep mang bad la dep pynlait 80 percent hynrei ia ka kam ym pat lah sdang na ka jingeh ban jied ia ki jaka “, la ong u Dr. Mukul.
Ula ong ba ki Deputy Commissioner ba dei peit ia kine ki iew khappud, ki la thoh shithi sha ki bor pyniaid na Bangladesh ban pynlong ia ka jingjurip lang ia ki jaka hynrei na ka liang ki bor na Bangladesh ki la pynsangeh bunsien ia kane ka jingthmu leit jurip.
La pyntip sha ka sorkar India halor kane bad ka la kular ban shim khia ban iakren bad ki bor sorkar ka Bangladesh, la bynrap u Dr Mukul.