Elekshon MDC shiteng samoi ha U Nohprah

Shillong, 14 Nailur:
Ka sorkar Jylla mynta ka sngi ka la pynbna tang ia u bnai ba kan pynlong noh ia ka elekshon MDC shiteng samoi ha u bnai Nohprah mynta u snem sha ki tylli ki konstitwensi ha KHADC bad kawei ha JHADC hynrei kam pat iathuh ia ka sngi ban pynlong ia ka jingjied ne sngi thep vote.
Haba kren hadien ba la wai ka jingialang hynne ka sngi, u myntri ka tnad District Council Affairs (DCA) u Bah Prestone Tynsong u la ong,”Ngin pynlong ia ka elekshon MDC shiteng samoi ha ki 7 tylli ki jaka ha u bnai Nohprah”.
Hynrei um shym la iathuh ia ka sngi ban pynlong elekshon bad ong, “ka shong ha u Lat ka jylla ban pynbna ia ka tarik elekshon”.
U myntri u la ong ba ka rai halor kane ka la wan hadien ba ka Meghalaya High Court ka la pdiang ia ka jingtyrwa ka sorkar ban pynlong ia ka elekshon.
Lah ban kdew ba ka High Court ka la takrain ia ka jingslem ka sorkar ban pynlong ia ka elekshon sha ki 7 tylli ki jaka kynthup 6 tylli ha KHADC bad kaei ha JHADC wat hadien jan dap shi snem naduh ba la risain ki MDC.
Lah ban kdew ba ka sorkar ka la tyrwa ban pynlong ia ka elekshon ha ka 13 tarik Nohprah bad ka buh ia ka sngi niew ha ka 16 tarik Nohprah.
Ka Supreme Court ka ri ka la pynsangeh ia ka rai ka Meghalaya High Court halor ka jingkyntait ia ka rai ka sorkar ban pynlong ia ka elekshon kumba la buh da ka sorkar.