Sah um dum kiba bun ki shnong ia u Aadhaar nombar

Shillong, 13 Nailur:
Ha kylleng ki shnong nongkyndong bad khapsor ki paidbah mynta kidang sah umdum la kin pdiang ne-em ia u Aadhaar nombar uba ki bor sorkar ki dang ia leh ban pynrung kyrteng shaid shaid mynta ha manla ki shnong. Bun na ki paidbah ki sah ha ka um dum namar don ki kynhun kiba ong ba ia u Aadhaar nombar ym lah ban pynbor iano iano ruh lait noh lada ki paidbah ki don da ka mon lajong ban pdiang ia u hynrei don pat ki shnong kiba pyntieng ia ki paidbah ba lada kim pdiang ia u Aadhaar nombar ki lah ban duh lut ki jingmyntoi ba ki ioh na ka sorkar jylla lane ka sorkar pdeng.
Haba ia kren bad u nongthohkhubor ki riew paidbah kiba long Kristan ki la pynpaw ba ki sheptieng ban pdiang ia u Aadhaar nombar da ka jingmut ba u lah ban dei uta u mrad khlaw kynsha u ba lah ban wan ha ka dur ban pyntlot ia ka jing ngeit blei jong ki hynrei ha kawei ka liang pat ki sheptieng naba ka don ka jingpyntieng ba lada kim pdiang ia utei u nombar yn pynduh lut ia ki ia baroh ki jingmyntoi kiba ki dei ban ioh kynthup naduh u khaw rashon.
Khyndiat sngi u nongthohkhubor u la sakhi ba ha kiba bun ki shnong ha khapsor la wah da ki jingpynbna ha ki dukan sha, ki dukan die jingdie ba baroh ki paidbah ki dei ban leit pynrung kyrteng ialade ban ioh ia u Aadhaar nombar bad la buh ruh da ka por ba yn pyndep hapoh ka sngi ba la buh. Wat ki bor shnong ruh kim pat da pei phang kumno katei ka jingpynrung kyrteng kan iaid hynrei ki la ong ba ka dei beit ka jingbthah na ki bor sorkar.
Lah ban pynkynmaw ba ka jingiakhih ban pyrshah ia u Aadhaar nombar da ki kynhun bapher bapher ka dang iaid mynta ha kaba katei ka kynhun kaba la ialam da u pastor PBM Basaiawmoit ka la pynksan ba ka ieng halor ka rai jong ka Supreme Court ba ym lah ban pynbor iano iano ruh.