Kam biang tang ka shuti bad ki jingialang ia u Tirot Sing:FKJGP

Shillong, 15 Naitung:
Ka Federation of Khasi, Jaintia and Garo People (FKJGP) ka la ong ba ka jylla ka dei ban pynkylla museum ia ka Khasi Patriotic Home kaba don ha Nongkhlaw kum ka jingburom ia u Syiem Tirot Sing.
Ka “Khasi Patriotic Home” ha Nongkhlaw kaba dei ka jaka ba kha ia u Tirot Sing la tei lyngba ka jingai jingmut jong ka FKJGP bad u Syiem ka Hima Nongkhlaw 17 tarik Naitung 1997. U MP barim bad bam kwai ha duwar u Blei u Prof GG Swell u la ai ia ka pisa na ka MP skhim bad u la plie ruh ia ka hadien ba la pyndep.
Ha ka dorkhas ba la ai sha u Myntri Rangbah ka jylla, FKJGP ka la pynpaw ia ka jingbym hun ia ka jingrakhe ia ka lyngkhuh sngi iap jong u Tirot Sing man u snem.
Ka jingrakhe ia ka sngi u Tirot Sing tang da kaba ai shuti, bad pynlong jingialang kim long kiba shongkhia ban rakhe ia ka nam bad ka kam jong u Tirot Sing kum riew khraw ka jaitbynriew Khasi.
Ka FKJGP ka la kwah ba ka sorkar ka dei ban shim ia ki lad ki lynti ba kan pyni sha ka pyrthei ia ki kam bad ki jinglong kyrpang jong u Tirot Sing ym tang da ka shuti bad ki jingialang hynrei ban kynmaw da ki kam ba khraw ia u.