Jowai, 11 Nailur:
Ki Kmie ki kpa jong kito ki samla pule kiba la pass bha shakhmat bad kiba la kmieh lynti ba ki khun jong ki kin ioh leit pule Doctor ha ka por kaba biang, hynrei ki don ha ka jingmut jingpyrkhat kaba dom, namar ba ka tnad jong ka koit ka khiah, ka Directorate of Health Service ka la khein sting palat ban pynbna ia ka result jong kito ki samla ki paw sha khmat katkum ka Result jong ka NEET kiba dei hok ban shah jied ha ka sorkar Jylla ban leit pule Doctor.
Ka tnad jong ka koit ka khiah (DHS and Health Department) ki la dep pynlong ia ka Health Screening Test ha ka 30 tarik une u bnai ba la dep.
Da ki spah ngut ki samla pule kiba la ioh 118 marks shaneng kiba la pynbna ba ki la long kiba lah ban pule Doctor, hynrei na ka liang ka sorkar wat hadien ar taiew, ym pat shym la pynmih satia ia ki kyrteng kito kiba dei hok ban ioh leit pule lyngba ka Meghalaya Quota.
Kiwei pat ki jylla ki la sdang ia ki class haduh shi bnai ar bnai shwa ba ka Meghalaya kan pynbna ia ki kyrteng kiba ioh ban leit pule bad kane ka la ktah jur ki samla pule ka jylla namar ki la duh ei shi bnai ar bnai ia ki jinghikai.
Kane ka jingslem palat ka sorkar ban pynbna ia ka kyrteng jong kito kiba dei hok ban ioh leit pule lynga ka State Quota, ka la pynkulmar jingmut wat ia ki kmie ki kpa jong kito ki samla ki wan sha khmat eh.
“Kane ka jingleh ka sorkar ka la pynbitar shi katdei eh ia ngi ki kmie ki kpa”, la ong uwei u rangbah na thain Dawki.
Ha kine snem ba la dep, ka sorkar ka la leh thurmur ha kane ka juh ka rukom ha kaba mar synmih ka result ka la pynbna ba dei ban leit join noh tang hapoh shisngi ar sngi ha rynkat ka jingsiew kaba dei ban siew ym duna ia ka 20 lane 25 hajar.
“Ka Sorkar ka dei ban sngewthuh ba kito ki khynnah kiba ioh ban pule lyngba ka Quota jong ka kidei kiba wan na ka longing kaba duh kaba duk, ki hap ban pan ram na kiwei pat ki marjan marpa bad kiba ieid bathoin.
La iathuh ba ka sorkar lyngba ka DHS ka ai por tang 24 kynta kata ka mut ba ka sorkar ka kwah ba kito kiba dei hok ban ioh leit pule kiba wan na ka longing kiba duna kin duh ia la ka hok jong ki.
Kaei ka jingthmu jong ka sorkar ban pynslem ia kane ka Result jong ki samla pule kiba dei hok ban ioh leit pule doktor katkum ka bha jong ka sorkar Jylla. Hato ki nongmihkhmat jong ngi ki lah ne em ban pynshai shangi u Paidbah”, la buh jingkylli ki kmie ki kpa jong ki Candidate kiba la qualified ia ka NEET Eksamin.
Phi don ban ong eiei?