Lah ban pyniaid dorbar hi ka lok U Mukul

Shillong, 11 Nailur:
U Myntri Rangbah ka jylla u Dr Mukul Sangma u lah ban hukum ia u Lamphang ka iing dorbar u AT Mondal ba un bynshet ia ka kam pyniaid dorbar ha ka lok jongu ka Dikkanchi D Shira lane ha u Winnerson D Sangma kiba dei ki dkhot ka liangsynshar ha ka sngi iatynjuh bor ban pynkhyllem ia u Lam-phang.
Ha ka sngi sdang ka iing dorbar, u Mondal u la thung saw ngut ki nong-pyniaid dorbar ha jaka jongu ba kynthup ia ka Dikkanchi D Shira, u Winnerson D Sangma na ka liangsynshar bad ar ngut na ka liangpyrshah kynthup u Bah Titosster Well Chyne bad u Bah Witting Mawsor kiba dei na ka liang pyrshah.
Khlem pep, lada u Lamphang un bynshet ia ka kam pyniaid dorbar ha ka jingiatynjuh bor ha u dkhot na ka liangpyrshah, ka jingshah rem ka lah ban jia hynrei ban khang lad ia kane, un hap ban bynshet ha ki dkhot ba dei na ka liangsynshar.
U Winnerson D Sangma u la risain noh shen na ka kam Parliamentary secretary shwa ban sdang ka dorbar bad kane ka la don eiei ka jingpynbeit jong u Myntri Rangbah na ka bynta kane ka kam ha iing dorbar.
Kumba ju long ha ka por ba don ka jingiatynjuh pyrshah ia u Lamphang, uno uno uba bat ia kane ka shuki, un hap ban aiti ban pyniaid noh kiwei.
Kine ki chairmen ba la thung u Lamphang, kin hap ban shim ia ka kam pyniaid dorbar namar ba u Depuy Speaker um don hadien ba la risain noh u Bah Sanbor Shullai.
Ha ka jingiatynjuh bor ha ka dorbar ba la dep, la pyniaid da u Bah Ronnie Lyngdoh uba la pynlait im na ka jingkhyllem u Lamphang.