Ka jingwan mih jong u lamphang dorbar na Goa, ban long u kong san, ha ka sngi pynkut jong ka lehniam Behdein khlam, ha ka sngi Saitjain ba ladep, ka la pyn lyng ngoh ia shibun ki riew pyrkhat bad wat ia ki pundit sain pyrthei ruh kumjuh.
Hynrei, U Ma OR Shallam, uba dei U President jong ka Sein Raij Jowai, u iathuh ha U Rupang, da kaba ong “U kwah ban wan peit ia ka Behdeinkhlam.`U kwah hi ma u, u iohi lyngba ka internet.’ U phah da ka email shanga” ong U Ma Shallam. La iathuh da U Ma Shallam, ba ia ka jingkwah jong u lamphang dorbar Jylla na Goa, ka dei la 45sngi eiei bad halor katei ka Sein Raij, ka pyntip sha ki bor pyniaid jong ka dorbar jylla, ha kaba u wan sha ka Jylla, kum u nongshah khot sngewbha.
“Ka bha ba u wan, nga sngewhun shisha ia ka jingwan jongu, ba un pynkhraw nam ia ka Behdeinkhlam. `Ha kawei ka sien, kin wan kham bun’. U khot sngewbha ba ngin leit sha Goa, ha ka lehniam jongki” ong U Ma Shallam, ha kaba ula pynthikna ba kin sa leit ha u bnai Nailar mynta u snem.
Namar ba U MP jong ka Shillong Constituency, U Ma Vincent Pala, u khlem don ha katei ka lehniam Behdeinkhlam, kaba dei ruh ka jinglehniam kaba khadduh ha shwa ka elekshon, ka ban long ha U Iaiong 2013, U Rupang, ula kylli ia U President ka Sein Raij, ha kaba ula ong “Ha kine ki san snem, tang shisien ruh u khlem wan”. La bteng biang U Ma Shallam, ban iathuh ba hadien ba ula wan phai na America, ula phone sha u, ha kaba u iathuh ba um ioh shuh ban wan, ba la phah kam ka seng Congress, ba kin leit sha Andhra lem bad kiwei ki MP. Hangta u ong biang “Nga ong ba un pan jingbit na ka President jongu, ba un wan ha ka 12tarik bad ban don lang ha ka 13tarik, hynrei, u ong ba um lah ban leh kumta”. La kren diaw da U Ma Shallam, da kaba ong “Nga sngewsih ba kum U MP jongngi … ki briew jongngi ki donhok”. La bteng biang da utei u rangbah ban ong “U khlem leh eiei hi iangi ruh, ba ngi donkam” bad ula batai ba ia u mawnongrim jong ka dukan jong ka Seij Raij, ula dep plie, hynrei haduh mynta, tang shi naia ruh u khlem ai, pynkut U Ma Shallam. La iathuh ba la khot sngewbha ruh ia baroh ki MLA bad kumjuh ia ki 7ngut ki MLA jong ka Jaintia Hills.
Phi don ban ong eiei?