Sahkut ka ktien Khasi bym ju kren u MP ha Parliament: Dr Sylvanus

Shillong, 14 Naitung:
Ka jingiakhih ban ithuh ia ka ktien Khasi ha ka 8th Schedule ka riti synshar ka ri, ka sahkut haduh kine ki sngi namar ba u Member Parliament (MP) uba mihkhmat ia ka jaitbynriew.
U Dr Sylvanus Lama re u nongthoh kot khasi ba pawnam bad uba dei ruh u nongkitkam ka Khasi Authors Society (KAS), u la ong ba ka jingiakhun ban ithuh ia ka ktien Khasi kum ka ktien ba kongsan ha India, ka sahkut namar ba u MP ba mihkhmat ia ka Shillong Parliamentary Constituency, um pat ju kren ei ei ia kane ka mat hapoh parliament.
“Ngi iakhun ban ithuh ia ka ktien Khasi la kham slem bah naduh ki snem 80 eiei hynrei ka jingiakhih jong ngi, ka sahkut namar ba ka daw ba kongsan u MP um ju kren ia kane ka mat ha Parliament”, la ong u Dr Sylvanus haba twad jingmut u Rupang.
U Dr Sylvanus uba long ruh mynta u Principal ka St Edumd College, u la ong ba khnang ba ka kam kan iaid shakhmat, ka long kaba kongsan ba dei ban rah shwa ha parliament.
U la ong ba ha une u MP ba mynta u Bah Vincent H Pala ka KAS ka la dep ai jingthoh bad ki kot ki sla kiba donkam ba un leh ia kaba donkam ha kaba iadei ban rah ia kane ka mat ha parliament. Hynrei sngewsih ba haduh mynta, ym ju kren shisien ruh ia kane ka mat hapoh Parliament.
“Ngi la dep ai ia ki kot ki sla haba ngi iakynduh ia u MP (bah Vincent H Pala). Ngi la ai ruh ia ka power point presentation kumba la pan da u MP”, la ong u Principal ka St Edmund’s College.
Ha kajuh u la ong ba ka jingkynnoh ba ka ktien Khasi ka dang duna ban ithuh ha Parliament, ka long kaba bakla. U la kyntait ruh ba ka ktien Khasi ka don hapdeng ka jingma, hynrei u la ong ba ka long kaba sngewsih ba bun ki Khasi kim nang ban burom ia la ktien lajong.
“Ki sngew tynnad palat ban kren ia ktien jong kiwei. Lada ki thied alomuri, shana budam, ki ktien dkhar kim treh kren Khasi”, la ong u Dr Sylvanus bad kane ka jinglong kaba sngew phylla bad donkam ban pynkylla ia ka rukom pyrkhat kum ka jaitbynriew.
U la ong ba ka ktien Khasi ha ka thoh ka tar ruh ka la roi hynrei ka jingnang ban ieit ban kren ia la ktien ka long kaba sngewsih. Peit nuksa kiwei ki jaitbynriew, u don tang ar ngut, ki iakren beit para maki wat don bun kiwei pat, katba ki Khasi pat da don uwei u dkhar, watla don 100 ngut khasi, u kren ktien nongwei.