Kut ka Behdeinkhlam, yn bha u khaw sha Pynthor Wah

Jowai, 14 Naitung:
Ka lehniam Beh deinkhlam 2013, ka la kut noh hynnin ka sngi, ha kaba u lamphang dorbar jong ka Goa, U Rajendra Arlekar, ula wan khnang ban sakhi ia katei ka lehniam Behdeinkhlam ba shisien shisnem ha Jowai.
Ha ka jingrakhe kaba shongshit bha, la wan rah 11tylli ki rot na ki Kmairaij ne ki dong bapher bapher sha Aitnar, kaba dei ka jaka lehniam pynkut jong ka Behdeinkhlam, ha kaba la thoh ia ki jingthoh bapher bapher kiba kut jingmut shibun, kum ka jingpynrem ia ka jingshah ban bein ki kynthei khynnah, kaba wan rah da ka dong Chiliangraij, ka jingpynsniew ia ka mariang, lyngba ki kar khana dewbilat, kaba la wan rah da ka Dong Lad Nartiang Ladthalaboh, ka jingpang AIDS bad ka jingsniew u droks kaba la wan rah da ka Dong Umshangiar bad kiwei kiwei.
Ha ka Lawakor, ka jingialehkai bol dieng, kaba dei ka bynta ba khadduh ka lehniam Behdeinkhlam, la jop da ka kynhun U Langdoh, kaba ialeh pyrshah ia ka kynhun U Sangot, ha kaba la ngeit ba U Khaw, un kham bha ha kane ka snem, sha ki bynta jong ka Pynthor Wah.
Kiwei kiba don lang ha katei ka jingpynkut ia ka lehniam Behdeinkhlam, ki long Ka kong Amparin Lyngdoh MLA, u ma Sniawbhalang Dkhar MLA, Ngaitlang Dhar MLA, ka kong Matsiewdor War Director Art & Culture, Ma PS Dkhar DC West Jaintia ryngkat u Ma HG Lyngdoh SP West Jaintia Hills.